Олимжон Назаров эртанги жанги олдидан тарозига чиқди + ФОТО

Биз учун аҳамиятлиси, оқшом доирасида чарм қўлқоп устамиз Олимжон Назаров (28-5) навбатдаги жангини ўтказади. Ўта енгил вазнда WBO Oriental камари соҳиби бўлиб турган Назаров таиландлик 27 ёшли Жакравут Мажунгоенга қарши рингга кўтарилади. 

Бугун боксчилар тарозидан ўтиш маросимида иштирок этишди. Иккала боксчи ҳам белгиланган вазн (50,8 кг) меъёрини бажаришди. 

Жакравут тажрибали боксчи бўлиб, фаолияти давомида 46 та жанг ўтказган. Ҳисобида 42 ғалаба, 2 дуранг ва 2 мағлубият бор. Иккала мағлубиятида ҳам нокаутга учраган. Ўзи эса 21 та жангда рақибларини муддатидан аввал таслим этган.

38 ёшли Назаров эса 33 та жанг ўтказган. Ҳисобида 28 ғалаба (15 нокаут) ва 5 та мағлубият бор. Аслида бу жанг 2022 йилнинг 10 декабрь куни Вьетнамнинг Хошимин шаҳрида ўтказилиши лозим эди. Аммо кейинчалик ташкилотчилар жангни Кореяга кўчиришди.

Маълумот учун, Олимжон Назаров сўнгги бор ўтган йилнинг 30 июль куни филиппинлик Биенвенидо Лигасни 114:113, 115:112, 115:112 ҳисобида мағлуб этиб, ўзига тегишли WBO Oriental камарини муваффақиятли ҳимоя қилганди.