Олимпиадага тайёргарлик, боксчилар билан учрашув ва туғилган кун. Ўзбекистон бокс федерацияси раҳбарияти "Янгиобод"да терма жамоа вакиллари билан учрашди

Тайёргарлик жараёнини кўздан кечириш, боксчиларимиз билан учрашиш учун кеча, 16 февраль куни Ўзбекистон Миллий олимпия қўмитаси раиси ўринбосари, Ўзбекистон бокс федерацияси раисининг биринчи ўринбосари Сакен Полатов бошчилигидаги ишчи гуруҳ кеча Тошкент вилоятидаги "Янгиобод" ўқув базасига борди. Айни пайтда ушбу масканда бокс бўйича терма жамоамиз вакиллари қизғин тайёргарлик олиб бормоқдалар. 

Федерация раҳбарияти аввалига Ўзбекистон аёллар терма жамоаси вакиллари билан мулоқот қилди. Ташкилий масалалар бўйича юзага келаётган камчиликлар, муаммолар ўрганилди. Спортчилар ўзларини қийнаётган муаммолар бўйича федерация раҳбариятига мурожаат қилишди. 

Шундан сўнг Сакен Полатов айни пайтда Олимпия ўйинларига тайёргарлик кўраётган боксчи йигитларимиз ва мураббийларимиз билан учрашди. 

"Олдимизда қандай масъулият турганини барчангиз яхши тушуниб турибсизлар деб ўйлайман. Мамлакат раҳбари, бокс мухлислари, умуман, ўзбек спорти ишқибозлари биздан Токиода ёрқин иштирокни кутишмоқда. Муҳтарам юртбошимиз томонидан бизга катта ишонч билдирилмоқда. Тайёргарлик учун зарур бўлган барча шарт-шароитлар муҳайё қилинган. Биз ўз навбатида, ушбу билдирилаётган ишончни оқлаб, Олимпиададан ёруғ юз билан қайтишимиз керак", - деди Сакен Полатов боксчиларимиз билан суҳбатда. 

Шундан сўнг, ўз таваллуд айёмини нишонлаётган боксчимиз Исроил Мадримов ушбу сана билан муборакбод этилди. Унга федерация томонидан эсдалик совғаси тақдим этилди. 

Учрашув сўнггида терма жамоамиз вакиллари эсдалик учун суратга тушишди.

Ўзбекистон бокс федерацияси матбуот хизмати