Олимпия ўйинлари чемпиони мухлислари билан учрашди + ФОТО

2020 йил 30 октябрь куни Ўзбекистон Республикаси Президенти Шавкат Мирзиёев раислигида мамлакатимизда таълим-тарбия тизимини такомиллаштириш, илм-фан соҳаси ривожини жадаллаштириш масалалари муҳокамасига бағишлаб ўтказилган видеоселектор йиғилишида берилган топшириқлар ижросини таъминлаш мақсадида жорий йил 6 февраль куни Ўзбекистон давлат жисмоний тарбия ва спорт университетига бириктирилган Тошкент вилояти Бўка туманидаги 11- ҳамда 20-сонли умумтаълим мактабларида Олимпиада, Жаҳон ва Осиё чемпионатларида совриндор бўлган спортчилар билан мактаб ўқувчилари ўртасида учрашув ташкил этилди.

Учрашувда “Рио-2016” Олимпия ўйинлари ғолиби Фазлиддин Ғойибназаров ҳамда “Пекин-2008” олимпиадасининг кумуш медали совриндори Абдулла Тангриев ва шахмат бўйича халқаро спорт устаси Саидакбар Сайдалиевлар иштирок этди. 

Шунингдек, Ўзбекистон давлат жисмоний тарбия ва спорт университети ва Халқ таълими муассасалари ўртасида яқин ҳамкорликни ўрнатиш мақсадида олий ўқув юртининг “Спорт мeнeжмeнти ва иқтисодиёт”, “Сув спорти, эшкак эшиш турлари назарияси ва услубияти” кафeдралари тумандаги 11-сон умумтаълим мактаби билан ҳамда “Бокс, таэквондо, қиличбозлик назарияси ва услубияти”, “Халқаро кураш турлари назарияси ва услубияти” кафeдралари 20-сонли умумтаълим мактаблари ўртасида ўзаро ҳамкорлик шартномалари имзоланди. Келгусида амалга ошириладиган иш режалари келишиб олинди. 

Эндиликда Ўзбекистон давлат жисмоний тарбия ва спорт университетининг профессор-ўқитувчилари ўзлари масъул бўлган ушбу мактаблардаги ўқувчиларни билим салоҳиятини янада ошириш, уларни касбга йўналтириш мақсадида машғулотлар олиб боради. Ўғил-қизларга ўзлари қизиққан спорт турларини ва бошқа фанларни мукаммал ўзлаштиришларида амалий ёрдам беради. Шунингдек, ўқитувчилар маҳоратини оширишда услубий кўмак кўрсатади.

Шунингдек, университет профессор-ўқитувчилари ва спортчилар мактабларга ташрифи чоғида ушбу мактаблар раҳбарияти, ўқитувчилари билан учрашди. Ҳар иккала таълим муассасасида олиб борилаётган дарс жараёнлари, ташкил этилган тўгараклар фаолияти билан яқиндан танишди.

Самимий кечган мулоқотлар чоғида мактаблардаги мавжуд муаммолар, камчиликларни имкон қадар қисқа фурсатларда бартараф этиб, таълим муассасалари рейтингини оширишга йўналтирилган режалар тузилди. Мазкур жараёнларда нафақат мактаб жамоаси шунингдек, ўқувчиларнинг ота-оналари ҳамкорлигини ҳам мувофиқлаштириш бўйича фикрлашиб олинди.

Учрашув сўнггида университет маъмурияти мактаб ўқувчиларига совғалар ҳадя этди.