Олмалиқлик гандболчи қизлар “Мустақиллик кубоги” соҳибалари + ФОТО

Ўзбекистон Республикаси Спортни ривожлантириш вазирлиги, Ўзбекистон гандбол федерацияси ва бошқа ташкилотлар ҳамкорлигида ташкил этилган мазкур нуфузли мусобақада Самарқанд, Наманган, Сирдарё вилоятлари, Тошкент шаҳри терма жамоаси, шунингдек, “Ёшлик” (Хоразм), РОПЗК (Тошкент), ОКМК (Тошкент вил.) ва СК “Туран” (Туркистон, Қозоғистон) жамоалари бош соврин учун ўзаро баҳс олиб боришди. 

Якуний натижаларга эътибор қаратсак, учинчи ўрин учун кечган ўйинда Қозоғистоннинг “Туран” жамоаси Тошкент шаҳри терма жамоасини бир тўп фарқи билан мағлубиятга  учратди - 38:37. 

Финалда эса Тошкент вилоятининг ОКМК ҳамда Самарқанд вилояти жамоалари рўбарў келишди. Ушбу учрашув олмалиқлик гандболчи қизларнинг 44:33 ҳисобидаги ғалабаси билан ниҳоясига етди. 

Натижада ОКМК жамоаси “Мустақиллик кубоги” соҳибига айланди.

Мусобақанинг ёпилиш маросими тантанали тарзда ташкил этилди. Ғолиб ва совриндор жамоалар ташкилотчилар томонидан тегишли даражада тақдирланишди.

Якуний жадвал: 1-ўрин. ОКМК. 2-ўрин. Самарқанд. 3-ўрин. СК “Туран”. 4-ўрин. Тошкент шаҳри. 5-ўрин. “Ёшлик”. 6-ўрин. Наманган. 7-ўрин. РОПЗК. 8-ўрин. Сирдарё.

Ушбу мусобақа ноябрь ойининг охири ва декабрь ойининг бошида Жанубий Корея давлатида аёллар ўртасида ўтказиладиган Осиё чемпионати олдидан Ўзбекистон аёллар терма жамоасига номзодларни саралаб олиш имконини берди.