ONE FC'даги учинчи ўзбек: Нурмуҳаммад Адамҳонов эртага дебют жангини ўтказади

Эртага Таиланднинг Бангкок шаҳрида One Championship промоутерлик компаниясининг муай-тайга асосланган One Friday Fights 5 мусобақаси бўлиб ўтади.

Эътиборлиси, ушбу мусобақа доирасида ўзбекистонлик ўта енгил вазнли Нурмуҳаммад Адамҳонов (0-1) ҳам жанг қилади. Ҳамюртимизга филиппинлик Фритц Биагман (4-1) рақиблик қилади.

Мусобақа Тошкент вақти билан 17 февраль, яъни эртага 17:30 да бошланади ва YouTube платформасидаги One Championship расмий канали орқали трансляция қилинади.

Қайд этиш жоиз, Адамҳонов ONE FC билан шартнома имзолаган учинчи ўзбекистонликка айланди. Бунгача аралаш яккакураш устаси Жасур Мирзамуҳаммедов ва муай-тайчи Мавлуд Тифиев ушбу лига билан ҳамкорликни бошлаган эди.