Осиё ўйинларига Шокин борадими ёки Бойқўзиев?

Қитъа ўйинлари дастуридан таэквондо мусобақаси ҳам ўрин олган бўлиб, жами 10та вазн тоифасида ғолиб ва совриндорлар номи маълум бўлади. Ўғил болалар -58, -68, -80 ҳамда +80 кг вазн тоифаларида даянга чиқишади. Қизлар эса -49, -57, -67 ва +67 кг вазнда медаллар учун баҳсларга киришишади. 

Кўпчиликни энг оғир вазн тоифасида юртимиз спорт шарафини ким ҳимоя қилади, леган савол қизиқтириши табиий. Боиси, бу вазнда бир йўла икки нафар кучли спортчи - жаҳон чемпиони Дмитрий Шокин ҳамда Осиё ўйинлари ғолиби Жасур Бойқўзиев иштирок этиши мумкин. 

Бизга хабар беришларича, Жакартадаги Осиё ўйинларига Шокин йўл олади. Айнан шундай танлов туфайли Жасур Бойқўзиев Рио Олимпиадасига ҳам олиб кетилмаган эди. Ваҳоланки, ўша пайтда у ҳам Шокин сингари Олимпиадада қатнашиш ҳуқуқини қўлга киритганди. Бир нарсани айтиш керак, Жасур деярли икки йилдан бери халқаро мусобақаларда иштирок этмай келаётганди.