Осиё велоспорти раҳбари Тошкентда

Меҳмон ўзбекистонлик спортчиларнинг ажойиб ғалабалари акс этган музей  экспозиция ва экспонатлари билан таништирилди. Сўнгра республикамизда велосипед спортининг ҳозирги ҳолати ва уни янада ривожлантириш истиқболлари, минтақавий ва халқаро доирадаги долзарб масалалар бўйича суҳбат бўлиб ўтди.

Рустам Қурбанов Осиё велоспорти раҳбарини қутлар экан, спортнинг бу турида Ўзбекистон ўз ютуқларига эга эканлигини, бироқ ўша ғалабалар анча аввал қўлга киритилганини, орада ўзига хос узилиш юзага келганини, сўнгги даврда мамлакатимиз федерацияси раҳбарияти томонидан велосипед спортини янада ривожлантириш ва ёшлар орасида оммавийлаштириш борасида бир қатор хайрли ишлар амалга оширилаётганини билдириб, ўсмирлар учун велосипедлар, паралимпиячи пойгачилар учун техника таъминоти борасида амалий ёрдам кўрсатилиши айни муддао бўлишини таъкидлади.

Ал Шафар Ўзбекистонда ўзини меҳмонда эмас, балки дўстларининг уйидагидек ҳис қилишини, спортга, хусусан болалар ва ўсмирлар ўртасида спортни ривожлантиришга катта эътибор берилаётганидан таъсирланганини айтиб ўтди. Осиё спорти эришаётган ютуқларда ўзбекистонликларнинг ҳам салмоқли ҳиссаси борлигига алоҳида тўхталаркан, велоспорт соҳасида ҳам юртдошларимиз сезиларли ўсиш имкониятларига эгалигини қайд этди. Осиё велоспорти раҳбари 11 май куни Ўзбекистон Республикаси бош вазири ўринбосари, Ўзбекистон велосипед спорти федерацияси раиси Танзила Нарбаева билан учрашув давомида ўзаро ҳамкорлик юзасидан атрофлича музокара олиб борилганидан хурсандлигини билдирди. 

Ўзбекистон жисмоний тарбия ва спорт давлат қўмитаси раиси ва Осиё велоспорт конфедерацияси  президенти ўртасидаги мулоқот чоғида Бирлашган Араб Амирликлари ҳамда Ўзбекистон велоспортчилари ўртасида икки томонлама ўқув-машғулот йиғинлари ўтказиш, Ўзбекистон велосипедчилар терма жамоасининг хорижда малака ошириши, тажриба алмашиши, нуфузли мусобақаларда иштирок этишини йўлга қўйиш, минтақавий велоклуб очиш, Ўзбекистонда велоспорт мураббийлари учун халқаро йиғинлар ташкил этиш, мамлакатимиз ҳудудида 2019 йилда велошоссе бўйича Осиё чемпионатини ўтказиш масалалари муҳокама қилинди. Меҳмон юртимизда бир қатор спорт турлари бўйича Осиё чемпионатлари юксак савияда ўтказилганидан яхши хабардорлиги, Осиё велоспорт конфедерацияси велошоссе бўйича мусобақани ўтказиш учун зарур бўлган ёрдамни беришга тайёрлигини таъкидлади. Дарвоқе, ўша йилги чемпионатда 2020 йилги ёзги олимпиадага йўлланмалар соҳиблари аниқланиши турнир нуфузини кўтариши шубҳасизлигига эътибор қаратилди.

Осиё велоспорти раҳбарининг мамлакатимизга ташрифи ўзбек велосипедчиларининг янги ютуқларига кўмаклашади деган умиддамиз.

Матбуот хизмати