Ўзбек таэквондо юлдузлари арафа куни савобли ишга қўл уришди

Бугун, 14 июнь куни муқаддас Ийду Рамазон байрами арафасида Ўзбекистон миллий олимпия қўмитаси ва таэквондо WTF ассоциацияси ташаббуси билан тадбир ташкил қилинди. Унда ўзбек таэквондоси юлдузлари Жасур Бойқўзиев, Никита Рафалович, Дмитрий Шокин, Ниёз Пўлатов, Нигора Турсунқулова, Светлана Осипова ва терма жамоамизнинг бошқа аъзолари бош мураббий Акмал Эргашев ва Таэквондо WTF ассоциацияси раҳбарлари билан бирга пойтахтимиздаги "Мурувват" ногирон болалар учун 2-сон интернат уйида меҳмон бўлишди.
Спортчилар тадбирида иштирок этиб, болажонлар учун ўзига хос байрам уюштириб беришди. Эстрадамиз юлдузлари Фаррух Комилов ҳамда "Афрўз" гуруҳи ҳам ўз чиқишлари билан байрамга ўзгача кайфият баҳш этишди. Тадбир давомида махсус-интернат тарбияланувчиларига ўйин-кулги уюштириб берилди, турли совғалар тақдим этилди.

Албатта, мана шундай муқаддас кунларда эътиборга муҳтожларнинг ҳолидан хабар олиш ўзбек халқининг олижаноб ҳислатларидан  ҳисобланади. Шундай экан, ташкил этилган ушбу тадбир ҳам савоб, ҳам ушбу эзгу ишларни амалга ошириш йўлида ўзига ҳос намуна вазифасини бажариб берганлигини қайд этиб ўтишимиз лозим.