Ўзбекистон чемпионатининг тантанали очилиш маросими бўлиб ўтди ФОТОГАЛЕРЕЯ

Тадбирда Вилоят спорт бошқармаси, Ўзбекистон дзюдо федерацияси мутасаддилари, фахрийлар, спортчилар ҳамда меҳмонлар ҳозир бўлишди.

 "Дзюдо — бу фақат спорт эмас! Бу чин маънода санъат, фалсафа, ўзаро ҳурмат белгиси ҳамдир. Айнан мана шу таърифу хислатларга биз татамидаги беллашувларда гувоҳ бўляпмиз. Ўзбекистон чемпионати шунчаки мусобақа эмас, бу халқаро ареналарга бошланадиган йўл, терма жамоага муносиб номзодларни етказиб бериши билан аҳамиятли турнир ҳисобланади", деди Жиззах вилоят Спорт бошқармаси бошлиғи Жалолиддин Ўктамов.  

Маросимда сўзга чиққан Ўзбекистон дзюдо федерацияси Бош котиби Азиз Собиров мусобақа иштирокчиларига омад тилаш баробарида, тўрт кунлик чемпионатни юқори савияда ташкил қилишда жонбозлик кўрсатаётган Жиззах вилояти мутасаддиларига миннатдорлик билдирди. 

Ўзбекистон чемпионатининг юқори савияда ўтиши учун бир неча кундан бери меҳнат қилаётган мезбонлар ўзбек дзюдосини дунёга танитиб келаётган инсонлар - Ўзбекистон Миллий олимпия қўмитаси раиси ўринбосари, Ўзбекистон дзюдо федерацияси раиси Азизжон Камилов, Олимпиада чемпиони, дзюдо бўйича дунёнинг энг ёш Олимпия ўйинлари чемпиони, терма жамоамиз бош мураббийи Илиас Илиадис, дзюдо бўйича ўзбекистонлик биринчи Олимпиада чемпиони, аёл спортчиларимиз орасида илк ёзги Олимпия ўйинлари чемпиони Диёра Келдиёрова, Олимпия ўйинлари совриндори, жаҳон чемпиони Давлат Бобонов, Париж Олимпиадаси совриндорлари Музаффарбек Тўрабоев ва Алишер Юсуповга зарчўпон кийдиришди. 

Ўзбекистон Республикаси давлат мадҳияси янграгач, тантанали очилиш маросимининг бадиий қисмига навбат берилди. Бадиий жамоаларнинг ажойиб чиқишларию, куй қўшиқлар аренага йиғилганларга хушкайфият бағишлади. Шундан кейин финал беллашувларига навбат берилди.