Ўзбекистон чемпионатининг тантанали очилиш маросимида вилоят ҳокими иштирок этди ФОТОРЕПОРТАЖ

Қорақалпоғистон Республикаси, барча вилоятлар ҳамда Тошкент шаҳридан 500 нафарга яқин истеъдодли дзюдочилар иштирок этаётган мусобақанинг иккинчи кунги финал беллашувлари олдидан тантанали очилиш маросими ташкил этилди. Унда Наманган вилояти ҳокими Шавкат Абдураззоқов, Ўзбекистон Миллий олимпия қўмитаси раиси ўринбосари, мамлакат дзюдо федерацияси раиси Азизжон Камилов иштирок этди. 

"Ассалому алайкум, ҳурматли спортчилар, мураббийлар, ҳакамлар, меҳмонлар, дзюдо ишқибозлари! Барчангизни “Паҳлавон” спорт мажмуасида ўтказилаётган дзюдо бўйича ёшлар ўртасидаги Ўзбекистон чемпионатининг тантанали очилиш маросимида кўриб турганимиздан хурсандмиз! Шубҳасиз, ўзбек дзюдоси дунёда ўз ўрни ва мавқейига эга. Турли йилларда Армен Багдасаров, Ришод Собиров, Абдулла Тангриев, Рамзиддин Саидов, Камол Муродов, Фарҳод Тўраев, Диёрбек Ўразбоев сингари дзюдочиларимиз Олимпиада ва жаҳон чемпионатларида мустақил Ўзбекистон довруғини дунёга янада танитишган. Бугунги кунда Шарофиддин Лутфуллаев, Шарофиддин Болтабоев, Давлат Бобонов, Диёра Келдиёрова, Гулноза Матниязова каби терма жамоамиз аъзолари бу аънанани давом эттиришмоқда. Шаҳримизда ўтказилаётган Ўзбекистон чемпионати иштирокчилари орасидан ҳам яқин йилларда терма жамоа сафида Олимпиадада шохсупага кўтариладиган дзюдочилар борлигига ишонаман", - деди Ш.Абдураззоқов.

Шундан сўнг Азизжон Камилов ҳам сўзга чиқиб, вилоятда оммавий ва профессионал спортга қаратилаётган эътиборга алоҳида тўхталди. 

"Сир эмас, Олимпия ўйинлари оиласига мансуб дзюдо Ўзбекистонда энг оммабоп спорт турларидан бири ҳисобланади. Юртимизда 50 мингдан зиёд ёшлар дзюдо билан шуғулланиб келишмоқда ва бу сон кундан-кунга ортиб бормоқда. Мамлакатимизнинг чекка қишлоқларидан ҳам дзюдо бўйича чемпионларнинг етишиб чиқаётгани бизни қувонтирмоқда. Айнан чекка ҳудудларда спорт турларини ривожлантириш, ёшларни жисмоний тарбия ва спорт билан шуғулланишлари учун шароит яратиш Давлатимиз раҳбари илгари сураётган устувор вазифа ҳисобланади. Бу мусобақада биз янги номлар, янги чемпионларни кашф этамиз. Насиб қилса, айнан сизлар яқин келажакда ўзбек дзюдоси юлдузларига айланасизлар. Бунинг учун ўз устингизда ишлашдан, меҳнат қилишдан асло тўхтаманг", - деди А.Камилов.    

Ўйлаймизки, Наманган шаҳрида ўтказилаётган ёшлар ўртасидаги Ўзбекистон чемпионати ҳар қачонгидан ҳам курашларга бойлиги билан мусобақага келган мухлисларда илиқ таассурот қолдиради. Иштирокчилар қалбида узоқ вақт муҳрланиб қолади.