Ўзбекистон давлат жисмоний тарбия ва спорт университетида ҳам регби жамоаси тузилади

Тадбирда Ўзбекистон регби федерацияси раиси, Ўзбекистон Республикаси Олий Мажлиси Сенати Раисининг биринчи ўринбосари Содиқ Сафоев, Ўзбекистон регби федерацияси бош котиби Қаҳрамон Жалилов, регби бўйича Ўзбекистон миллий терма жамоаси бош мураббийи Даниил Куликов, Ўзбекистон давлат жисмоний тарбия ва спорт университети ректори, профессор Маҳмуджон Болтабаев, Гандбол, теннис, бадминтон назарияси ва услубияти кафедраси мудири Шуҳрат Тўлаганов ҳамда ОАВ вакиллари иштирок этишди.

Учрашувда 2019 йил 29 октябрдаги «Ўзбекистон Республикасида регбини ривожлантириш чора-тадбирлари тўғрисида»ги Президент қарорининг тегишли бандлари ижросини таъминлаш мақсадида федерация ва университет томонидан олиб борилаётган ишларга алоҳида тўхталинди.

Хусусан, жорий ўқув йилидан университетда «регби» бакалавриат йўналиши очилиб, 21 нафар талаба қабул қилингани алоҳида эътироф этилди.

Шунингдек, учрашув якунлари бўйича регби спортини ёшлар орасида оммалаштириш, аёллар регби спортини ривожлантириш, иқтидорли спортчиларни излаб топиш, университет регби жамоасини тузиш, келажакда Жаҳон чемпионатлари ва Олимпия ўйинларига тайёргарлик кўриш каби вазифаларни ҳамкорликда амалга ошириш бўйича меморандум имзоланди.