Ўзбекистон дзюдо федерациясида "Очиқ эшиклар куни" ўтказилади

Мустақил Ўзбекистон спорт делегациясига Олимпиададаги илк медални ҳам айнан дзюдочимиз тақдим этган. 1996 йилги Атланта Олимпиадасида иштирок этган Армен Багдасаров кумуш медаль соҳибига айланган эди. 

Шундан сўнг ўтган давр мобайнида тўрт йилликнинг энг нуфузли мусобақасида Ришод Собиров (3 та бронза), Абдулла Тангриев (кумуш), Диёрбек Ўрозбоев (бронза) ҳам Олимпиада шохсупасига кўтарилди. Ҳозирда терма жамоамиз аъзолари дзюдо ватани - Токиода ўтказиладиган Олимпия ўйинлари йўлидаги муҳим рейтинг мусобақаларига тайёргарлик кўришяпти. Уларни номма-ном айтмасак ҳам бундан яхши хабардорсиз. 

Афсонавий дзюдочи, Олимпиада чемпиони, уч карра жаҳон чемпиони Илиас Илиадис бош мураббийлигидаги юлдузли таркиб дзюдочиларимиз эртага, 22 декабрь куни ўтказиладиган "Очиқ эшиклар куни"да ҳозир бўлишади ва тадбирга келадиган сиз азизларга ўз маҳоратларини намойиш этишади. Дзюдочиларимиздан ташқари айни пайтда Тошкентда машғулот ўтказаётган Грузия терма жамоасининг юлдузли таркиби ҳам "Очиқ эшиклар куни"да иштирок этади. 

 Соат 10:00да Ўзбекистон дзюдо федерациясида бошланадиган маросимнинг қизиқарли ўтишига кафолат берамиз. Сизларни ажойиб совғалар кутмоқда! 

Тадбир давомида дзюдочиларимизнинг машғулотларини кузатиш, улар билан мулоқот қилиш ҳамда суратга тушиш имкониятига эга бўласиз. 

"Очиқ эшиклар куни"га барча мухлислар ҳамда оммавий ахборот воситалари ходимларини таклиф этамиз.