Ўзбекистон дзюдо федерациясида "Очиқ эшиклар куни" ўтказилди ФОТОГАЛЕРЕЯ

Ушбу тадбирни ўтказишдан кўзланган асосий мақсад олимпия оиласига мансуб дзюдо яккакураш спорт турини аҳолининг кенг қатлами орасида янада оммалаштириш, дзюдога бефарқ бўлмаган юртдошларимизни мустақиллик йилларида қўлга киритилган ютуқлар ҳамда терма жамоамиз аъзолари билан яқиндан таништиришдан иборат эди.         

Тадбир давомида "Очиқ эшиклар кунига"га ташриф буюрганлар Ўзбекистон, Грузия, Россия, Словения ва Тожикистон терма жамоаларининг халқаро ўқув-машғулот йиғинини кузатиш, улар билан мулоқот қилиш ҳамда суратга тушиш имкониятига эга бўлдилар. Терма жамоа бош мураббийи, Олимпиада чемпиони, уч карра жаҳон чемпиони Илиас Илиадис, терма жамоамиз аъзолари ўз маҳорат сабоқларини намойиш этишди. Илиадис дзюдо билан шуғулланиш истагида келган болажонлар билан бирга машғулот ўтказди.    

"Очиқ эшиклар куни" сўнггида маросимга келган болажонлар, шунингдек, дзюдо тадбирларини ёритишда ҳамкорлик қилиб келаётган оммавий ахборот воситалари ходимларига Ўзбекистон дзюдо федерациясининг эсдалик совғалари топширилди. Терма жамоамиз дзюдочилари ўз дастхатлари туширилган футболкаларни ташрифчиларга тақдим этишди.