Ўзбекистон Миллий олимпия қўмитаси 29 ёшда!

Бу орқали сайёрамиздаги миллатлар ва элатлар, дунё аҳли бир мақсад остида бирлашадилар. Халқаро Олимпия қўмитаси шафелигида фаолият олиб бораётган барча мамлакатлардаги Олимпия қўмиталари ўз юрти ва шаъни учун жаҳон ареналарида рақобат олиб бормоқда. Шу жумладан, Ўзбекистон Миллий олимпия қўмитаси ҳам.

Бугун 2021 йил 21 январь. Ўзбекистон Миллий Олимпия қўмитаси ташкил этилганига 29 йил тўлди. 1993 йилнинг сентябрь ойида Халқаро Олимпия қўмитасининг 101-Сессиясида Ўзбекистон Миллий олимпия қўмитаси ХОҚ томонидан расман тан олинган ва шундан сўнг ташкилот халқаро майдонда фаолият олиб бориш имкониятига эга бўлган. Шу кундан эътиборан, Ўзбекистон мунтазам равишда ёзги ва қишки Олимпия ўйинларида қатнашиб келмоқда.

МОҚ бугун мамлакатимизда соғлом турмуш тарзини тарғиб қилиш, жисмоний тарбия ва спортни ривожлантириш, олимпизмнинг пок ва эзгу ғояларини илгари суриш йўлида кенг кўламда иш олиб бормоқда. Бундан ташқари, халқаро алоқаларни мустаҳкамлаб, нуфузли спорт ташкилотлари, етакчи спорт державалари билан кенг қамровли ҳамкорликни йўлга қўйган.

Ортда қолган вақт мобайнида Ўзбекистон делегацияси 7 та қишки ва 6 та ёзги Олимпия ўйинларида 10 та олтин, 7 та кумуш ва 17 та бронза медалларини қўлга киритди. Миллий олимпия қўмитаси халқаро ареналарда, комплекс мусобақаларда муваффақиятга эришиш учун Жисмоний тарбия ва спорт вазирлиги, спорт федерациялари ва ассоциациялари билан ҳамжиҳатликда иш олиб бормоқда. Ташкилот томонидан Токио-2020 Олимпия ва Паралимпия ўйинларига муҳтарам Президентимиз берган кўрсатмалар асосида тайёргарлик олиб борилмоқда. Лицензион мусобақаларга ҳозирлик кўраётган терма жамоаларимизнинг хорижий ўқув-машғулот йиғинларида иштирок этиши учун имконият яратилмоқда.

Ўзбекистон Миллий олимпия қўмитаси келажакда, хусусан, Токиода бўлиб ўтадиган Олимпия ўйинларида ҳам жонажон ватанимиз шаънини муносиб ҳимоя қилиб, ёрқин ғалабалар билан халқимиз ва муҳтарам Президентимизни хурсанд қилишга ваъда беради.

Фурсатдан фойдаланиб, бугунги байрам муносабати билан спорт турлари бўйича федерация ва ассоциацияларни, терма жамоаларимизни, олимпиячиларимизни ва уларни тарбиялаётган жонкуяр мураббийларимизни, ўзбек спортининг ашаддий мухлисларини самимий муборакбод этамиз.