Ўзбекистон самбо ассоциацияси раҳбарияти ЎзЖОКУда ўтказилган тадбирда иштирок этди

Унда университет ректори Шерзод Қудратхўжа, Ўзбекистон самбо ассоциацияси раиси Алишер Алимов, терма жамоамиз мураббийлари Роман Шакиров ва Екатерина Близнецова, Туризм ва спорт вазирлиги матбуот хизмати мутахассиси Отабек Эшмаматов ва университетнинг спорт журналистикаси факультетида таҳсил олаётган талабалар иштирок этишди.

Ўзбекистон самбо ассоциацияси раиси талабалар билан учрашувда самбо бўйича Тошкентда ўтказилган жаҳон чемпионати ҳақида гапириб берди.

"Сўнгги йилларда Ўзбекистонда ижобий ўзгаришлар бўлаётгани сир эмас. Уч йил олдин мен ҳам жамоамиз билан биргаликда ассоциацияда иш бошладик. Қайд этиш лозимки, охирги нуфузли мусобақаларда терма жамоамиз натижалари яхшиланди. Сўнгги жаҳон чемпионатида дунё миқёсида умумжамоа ҳисобида иккинчи ўринни қўлга киритдик. Агар шу йўналишда ишлашда давом этсак, биринчи ўринга ҳам чиқамиз. 

Бунинг замирида мамлакатимиз раҳбариятининг спортга, ҳусусан самбога қаратилаётган эътибор ҳам турибди. Бу шунчаки қуруқ гап эмас. Ҳақиқатдан ҳам ҳозирда самбога эътибор ошган. Буни спортчиларимиз ҳам ҳис қилиб туришибди ва ушбу эътиборга яраша, яхши натижалар билан жавоб қайтаришмоқда.

Спортчининг ютуғида нафақат унинг ўзи, балки бутун бошли жамоа, ҳусусан ОАВ ходимларининг ҳам ўз ўрни бор. Қилинаётган ишлар, эришилаётган натижаларни халққа етказиш учун ҳам сизлар кераксиз. Бу жараёнларда сизнинг ўрнингиз жуда катта", - деди Алишер Алимов.

Шунингдек, тадбирда университет ректори Шерзод Қудратхўжа талабалар учун мотивацион маъруза ўтди. 

Учрашув давомида талабалар ўзларини қизиқтирган саволлар билан иштирокчиларга мурожаат қилиш имкониятига эга бўлишди.