Ўзбекистон терма жамоаси 107 давлат қатнашган Жаҳон чемпионатидаги иштирокини нечанчи ўринда якунлади?

Дунё биринчилигининг сўнгги куни оғир вазн (эркакларда -100, +100 кг, аёлларда +78 кг) тоифаларида ғолиб ва совриндорлар аниқланди. Биз учун жаҳон чемпионатининг биринчи ва охирги куни омадли келди. Диёра Келдиёрова кумуш медаль билан юришимизни бошлаб берган бўлса, Алишер Юсупов сўнгги кун бронза медалини қўлга киритди. 

Сайёрамизнинг 107 давлати қатнашган мусобақада Япония терма жамоаси умумжамоа ҳисобида биринчи ўринни эгаллади. Дзюдо ватани вакиллари 3 та олтин, 2 та кумуш, 4 та бронза медалларини қўлга киритишди. Грузия 2 та олтин, 1 тадан кумуш ва бронза медали билан иккинчи ўринни банд этган бўлса, Корея Республикаси 2 та олтин, 3 та бронза эвазига кучли учликка якун ясаб берди. 

Ўзбекистон терма жамоаси 1 та кумуш ва 1 та бронза медали билан 107 давлат орасида 11-ўринни эгаллади. Тўққиз давлат камида 1 та олтин, 15 мамлакат 1 та кумуш, 24 терма жамоа камида 1 та бронза медалини қўлга киритди.