Ўзбекистонда 38 йилллик тарихга эга бўлган теннис мусобақаси ҳақида

Бундан бир неча кун олдин пойтахтимиздаги Республика Олимпия захиралари теннис мактабида ўсмирлар ўртасида "Grade-2" мусобақаси 38-маротаба ўтказилди. Ушбу турнир ўсмирлар ўртасида теннис бўйича Ўзбекистондаги энг обрўли ва энг кўп рейтинг очколарини берувчи мусобақа ҳамдир. 18 ёшгача бўлган ёш теннисчиларимиз учун мазкур турнир доимо ўзига хос тажриба мактабини ўтаб келган. Деярли ҳар бир ўзбек  теннисчиси ўсмирлик даврида ушбу мусобақада иштирок этган.
Тарихга назар ташлайдиган бўлсак, ушбу мусобақа 1999 йилгача G-5, 2002 йилгача G-4, кейин G-3 мавқеига эга бўлган. 2012 йилдан бошлаб эса G-2 даражасигача кўтарилди. Бу турнирда ҳатто ўз вақтида жаҳоннинг биринчи ракеткаси бўлган Марат Сафин хам иштирок этган.

Ҳамюртларимиздан қизлар ўртасидаги баҳсларда ўз вақтида Ирода Тўлаганова, Альбина Хабибуллина, Сабина Шариповалар бу мусобақада бош совринга эга чиққанлар. Эркаклар ўртасидаги баҳсларда эса Денис Истомин, Темур Исмоилов(2марта), Жўрабек Каримов (2марта) ғолиб бўлган.

Бу мусобақа турли йилларда март, апрель ва май ойларида ўтказилган. Фақатгина, сўнги йилларга келиб март ойининг ўрталарида ташкил қилинмоқда. Ҳар йили ўсмирлар рейтингида "Топ-100"га кирувчи бир қатор теннисчилар ушбу мусобақада иштирок этиш истагини билдиришади. Бу йилги беллашувлар ҳам бундан мустасно эмас. Вакилларимиздан 2001 йилда туғилган Сергей Фомин мусобақа бошланишидан олдин ўсмирлар рейтингида 88-ўринда борарди. Ушбу турнирда ёш спортчимиз тўртинчи рақамда сараланди ва мусобақа финалига қадар этиб борди. Бу йўлда у ҳатто турнирнинг биринчи рақамли теннисчисини хам мағлуб эта олди. Афсуски, бош мукофот учун белгиялик Бовий Арнаудга қарши кечган баҳсда у  3/6, 3/6 ҳисобларида ютқазиб қўйди. Шу тариқа, Фомин ўсмирлар рейтингида 75, рақиб эса 100 очкога эга бўлди.

Турнирдан сўнг Сергей Фомин 19 поғона юқорилади ва ҳозирда 69-ўринга кўтарилган. Вакилларимиздан шунингдек, Темур Соттимов иккинчи даврагача етиб борди. Қизларимиз эса турнирда бироз омадсиз қатнашишда. Ясмина Каримжонова ва Олеся Ким иккинчи даврада мағлубиятга учради. Ваҳоланки, мусобақада ҳамюртларимиздан ўғил болалар ва қизлар ўртасидаги баҳсларда етти нафардан теннисчи иштирок этганди.

Ўйлаймизки, келажакда ушбу мусобақа мавқеи янада кўтарилади ва ҳали узоқ вақт ўсмир теннисчиларимизнинг тажриба орттиришида, ўсишида ўз ҳиссасини қўшиб боради. Биз ушбу мусобақа иштирокчилари ва ташкилотчиларига улкан зафарлар тилаб қоламиз!

Ҳусниддин Мирзалиев