Ўзбекистонда ҳакамлик фаолиятини ривожлантириш йўлида навбатдаги қадам ташланди

 Ушбу лойиҳа доирасида ўтган йилнинг декабрь ойида Тошкент шаҳрида IBAнинг кўзга кўринган инструкторлари, тажрибали реферилари иштирокида семинарлар ташкил этилганди. 

Мазкур лойиҳанинг давоми сифатида вилоятларда ҳам Ўзбекистон бокс федерацияси мутахассислари томонидан семинарлар ташкил этилмоқда. Шу кунларда Наманган шаҳрида водий вилоятлари, шу жумладан Фарғона, Наманган, Андижон вилоятлари ҳамда Тошкент шаҳридан ҳакамликка 50 нафардан ортиқ номзод учун семинар бўлиб ўтмоқда. 

Семинар Ўзбекистон бокс федерацияси ҳакамлар ҳайъяти раиси Бекжон Юсупов, Ўзбекистон бокс федерацияси ижрочи директори Шоҳид Тиллабоев, федерация мутахассиси Мирсолиҳ Сагатов томонидан ташкил этилган. 

Ушбу семинар 11-14 август кунларига мўлжалланган. Семинар дастуридан назарий ва амалий дарслар ўрин олган. Дастлабки икки кунда назарий машғулотлар ўтказилса, яна икки кун амалий машғулотларга бағишланади. Қайд этиш лозимки, амалий машғулотлар шу кунларда Наманган мезбонлик қилаётган ёшлар ўртасидаги Ўзбекистон кубоги доирасида ўтказилади. Семинар якунида ўтилган мавзулар юзасидан имтиҳон ҳам ташкил этилади ва синовлардан муваффақиятли ўтганлар учун махсус сертификатлар тақдим этилади. 

Бундай семинарларнинг кейингиси Воҳа вилоятлари бўйлаб ташкил этилиши режалаштирилган. 

Ўзбекистон бокс федерацияси ушбу лойиҳа орқали мамлакатимизда ташкил этиладиган вилоят биринчиликлари, Ўзбекистон чемпионатлари ва кубоклари учун яхши савиядаги ҳакамлар етказиб бериш, уларнинг савиясини кўтариш ва федерация қошидаги ҳакамлик корпусини мустаҳкамлашни ўз олдига мақсад қилиб қўйган.