Ўзбекистонда Халқаро дзюдо куни кенг нишонланди ФОТОРЕПОРТАЖ

Халқаро дзюдо федерацияси (IJF) таклифи билан бу йилги байрам тантаналари "Бирдамлик" (Solidarity) шиори остида ўтказилди. Қорақалпоғистон Республикаси ва барча вилоятлар қатори Тошкент шаҳрида ҳам дзюдочилар байрами кенг тантана қилинди. 

Унда Ўзбекистон Туризм ва спорт вазирлиги, Миллий олимпия қўмитаси мутасаддилари, мураббийлар, ёш дзюдочилар ва уларнинг ота-оналари ҳамда оммавий ахборот воситалари ходимлари ҳозир бўлишди.

Ўзбекистон Миллий олимпия қўмитаси Бош котиби Ойбек Касимов, Ўзбекистон спорт фахрийлари кенгаши раиси Баҳодир Махситов, "Ўзбекистон Республикасида хизмат кўрсатган спорт устози" фахрий унвони соҳиби Владимир Пятаев, терма жамоа бош мураббийи Илиас Илиадис ва бошқалар сўзга чиқиб, дзюдочиларни байрам билан қутлашди. 

"Бугун бутун дунёда бўлгани каби юртимизда ҳам "Халқаро дзюдо куни" кенг нишонланмоқда. Биз ҳам ушбу тадбирга ўз хиссамизни қўшаётганимиздан бахтиёрмиз. Фурсатдан фойдаланиб, ўзбек дзюдоси оиласини ушбу кун билан муборакбод этаман. Насиб қилса, яқин келажакда сиз жажжи дзюдочилар халқаро мусоақаларда акаларингиз сингари Ватанимиз шарафини муносиб тарзда ҳимоя қилиб, ўзбек дзюдосининг шонли анъаналарини давом эттирасизлар. Ўз навбатида, спортчиларимизнинг мана шундай замонавий спорт залларида шуғулланишлари учун шароит яратиб бераётган муҳтарам Президентимизга ҳам раҳмат айтаман", – деди МОҚ Бош котиби О.Касимов.

"Ассалому алайкум, қадрли меҳмонлар, мураббийлар, дзюдочилар! Сизларни 28 октябрь, дзюдо асосчиси - Дзигоро Кано таваллуд топган кун ва шу муносабат билан ҳар йили бутун дунёда айнан бугунги санада нишонланадиган Халқаро дзюдо куни билан табриклайман. Сир эмас, дзюдо бутун дунёда, шу жумладан Ўзбекистонда ҳам оммавий спорт тури ҳисобланади. Бу яккакураш билан шуғуланаётганлар сони йилдан-йилга ортиб бормоқда. Улар орасида турли ёшдаги инсонларнинг борлиги дзюдонинг оммавий спорт тури эканини тасдиқлайди. Ҳозирда дзюдо билан фақат профессионал спортчи бўлиб етишиш учун эмас, балки ўз саломатлигини янада мустаҳкамлаш, ҳаётида соғлом турмуш тарзини қарор топшириш учун ҳам шуғулланишяпти. Фурсатдан фойдаланиб, барча спортчиларга мустаҳкам соғлиқ, куч, ирода ва ғалаба ёр бўлишини тилайман!", - дея ўз табригини изҳор этди Б.Махситов.  

Шундан сўнг Камол Мурадов ва Ўлмас Гуллиев мураббийлигидаги ёш дзюдочиларимиз татамида ўз чиқишлари билан маҳорат ва иқтидорларини намойиш этишди. Фахрийлар номидан сўзга чиққан Владимир Пятаев ёш дзюдочилар акаларининг изидан бориб, уларга муносиб ворис бўлишга чақирди.  

Шундан сўнг фахрий меҳмонлар ҳамда ёш дзюдочиларга эсдалик совғалари топширилди. Маросим сўнггида анъанага мувофиқ байрам торти кесилиб, меҳмонларга тортиқ этилди. Барча қатнашчилар эсдалик учун суратга тушишди.

Суратлар муаллифи - Алимурод МАМАДАМИНОВ, ўз мухбиримиз