07 мар 10:10
Янгиликлар

Тадбирлар

ЎзДЖТСУ талабаларининг оталарига эҳтиром кўрсатилди + ФОТО

Теглар : ЎзДЖТСУ

Ўзбекистон давлат жисмоний тарбия ва спорт университетида Спортни бошқариш ва туризм факультети ташаббуси билан “Оталарга эҳтиром” мавзусида маънавий-маърифий, бадиий-мусиқий тадбир ташкил этилди.

Дастлаб, республикамизнинг турли ҳудудларидан ташриф буюрган 200 нафардан ортиқ ота-оналарга олийгоҳда уларнинг фарзандлари таълим олиши ҳамда яшаши учун яратилган шароитлар билан яқиндан танишиш мақсадида университет ҳудуди бўйлаб кичик экскурсия ташкил этилди.

Табиийки, ота-оналар талабаларга яратилган шароит ва ўқув жараёнларининг самарали олиб борилишини кўриб, бундан мамнун бўлишди.

Шундан сўнг, оталарга бағишланган тадбир бошланиб, уни факультет декани Азизхон Тилляходжаев, Ёшлар билан ишлаш маънавият ва маърифат бўлими бошлиғи Р.Бабажановлар очиб берди.

Тадбир давомида эса талаба-ёшлар томонидан маромига етказиб тайёрланган саҳна кўринишлари, ифодали ўқилган шеърлар ва ўзига хос тарзда ижро этилган куй-қўшиқлар, жозибадор рақслар барчада ёрқин таассурот қолдирди.

Якунда университет раҳбарияти томонидан шундай намунали, иқтидорли ҳамда ташкилотчи фарзандларни вояга етказгани учун барча оталару оналарга ташаккурнома ва эсдалик совғалари топширилди.