O‘zDJTSU ва Elsevier: Халқаро илмий алоқалар мустаҳкамланмоқда

Бир йил давомида бутун дунё бўйича чоп этиладиган барча илмий мақолаларнинг чорак қисми ана шу компанияга тегишли илмий журналларда нашр этилиши унинг қамрови ва нуфузига яққол далилдир.

1880 йилда Амстердам (Нидерландия)да асос солинган мазкур нашриёт уйи ўнлаб минтақа ва мамлакатларда ўз филиалларига эга. Марказий Осиё ҳам бундан мустасно эмас. Республикамиздаги кўплаб давлат ва нодавлат муассасалари Elsevier билан ҳамкорликни йўлга қўйишган. Мисол тариқасида Бош прокуратура академияси ва “Юксалиш” умуммиллий ҳаракати Elsevier компанияси билан ҳамкорлик Меморандуми имзолаганини айтиб ўтиш мумкин. Замон талаби бўлган ушбу жараёндан олий ўқув юртларининг илмий-педагогик жамоаси ҳам четда қолаётгани йўқ. 

Ўзбекистон давлат жисмоний тарбия ва спорт университетида Elsevier компаниясининг Марказий Осиё бўйича минтақавий директори Алия Оспанова, Ўзбекистондаги миллий координатори Дилноза Алланазарова иштирокида ўтказилган учрашувда юқоридагилар ҳақида атрофлича сўз юритилди. Университетнинг тажрибали профессор-ўқитувчилари ва ёш тадқиқотчилари илмий нашрлар соҳасидаги халқаро экспертлар билан очиқ мулоқотга киришдилар. Таълим ва илмий-тадқиқотчилик фаолияти борасидаги алоқаларнинг асосий йўналишлари ва уларнинг аҳамияти хусусида суҳбатлашдилар.

Яқин ҳамкорликнинг амалий ифодаси сифатида магистр ва докторантлар учун А.Оспанова томонидан “Халқаро стандартлар асосида илмий мақолалар тайёрлаш” мавзусида мастер-класс ўтказилди. Унда халқаро стандартлар асосида илмий мақолалар ёзишнинг ўзига хос жиҳатлари батафсил тушунтирилди, юқори рейтингли нуфузли журналларда чоп этиладиган мақолаларни тайёрлаш бўйича маслаҳат ва тавсиялар берилди.

Маълумот ўрнида жорий йил октябрь ойининг бошида Elsevier компанияси томонидан Uzbekistan Research Online – Ўзбекистон Республикасининг илк рақамли рецензияланадиган илмий журналлар онлайн платформаси яратилганини айтиб ўтиш жоиз. Муҳим жиҳати шундаки, бу платформа Scopus мезонларига мувофиқ ишлаб чиқилган. 

Ўзбекистон давлат жисмоний тарбия ва спорт университетининг Илмий ишлар ва инновациялар бўйича проректори Рашид Маткаримов ва Elsevier компаниясининг Марказий Осиё бўйича минтақавий директори Алия Оспанова ўртасидаги музокараларда “Фан – спортга” илмий-назарий журналининг савиясини кўтариш, форматини замон талабларига мослаштириш ва ушбу нашрнинг нуфузли рейтингларга киришини таъминлаш билан боғлиқ масалаларда фикр алмашилди.

Бу эса Scopus халқаро стандартларига интеграциялашиш йўлидаги навбатдаги дадил қадамдир.

Маълумот учун: “Эльзевир” (Elsevier) — фан, таълим ва тиббиёт соҳасида инновацион ечимларни ва маҳсулотларни таклиф этадиган жаҳондаги энг йирик нашриётлардан бири ҳисобланади.

Компаниянинг қароргоҳлари Амстердам, Лондон, Нью-Йорк шаҳарларида жойлашган бўлиб, дунёнинг кўплаб давлатларида ўз офислари бор.

Нашриёт «Reed Elsevier» медиа-холдингнинг бир қисми бўлиб, у жаҳоннинг энг йирик компаниялари рўйхатига киради. Кўплаб журнал, китоб ва маълумотномаларни чоп этади. Нашриётда “Scopus” илмий нашрлар ва цитата келтириш маълумотлар базасини олиб боради, “Science Direct” илмий нашрларни тарқатиш тизимини ривожлантиради.

Университет матбуот хизмати