London Chess Classic 2025. Нодирбек Абдусатторов ҳинд шахматчисини мағлуб этди

Мукофот жамғармаси 50 000 фунт стерлингни ташкил этувчи ушбу нуфузли мусобақада дунёнинг кўзга кўринган 10 нафар шахматчиси қатори ёш гроссмейстеримиз Нодирбек Абдусатторов ҳам иштирок этяпти. Биринчи даврада британиялик гроссмейстер Гаваин Жонс билан дуранг ўйнаган ҳамюртимиз иккинчи турда ғалабага эришди. Абдусатторов оқ доналарда ҳиндистонлик Мишра Абҳиманюни мағлубиятга учратди. 

Биринчи турдаги барча партиялар дуранг натижа билан якунланган эди. Иккинчи турда эса 3 та жуфтликда ғалаба қайд этилди. Грециялик Николас Теодору ва биринчи рақамли иштирокчи франциялик Алиреза Фирузджа рақибларидан устун келишди. Турнир жадвалида Фирузджа, Теодору ва Нодирбек 1,5 очко билан пешқадамлик қиляпти. Бугун 3-турда Абдусатторов Англия шарафини ҳимоя қилаётган россиялик гроссмейстер Никита Витюговга қарши дона суради. Витюгов дастлабки икки турда дуранг ўйнаган.