Хамзат Чимаев ҳам, Нассурдин Имавов ҳам тасдиқлади

Мағлубият нималигини билмай келаётган россиялик аралаш яккакураш устасининг рақиби Франция шарафини ҳимоя қилаётган доғистонлик Насурдин Имавов бўлади. Ушбу маълумотни титул жангининг иккала иштирокчиси ҳам ижтимоий тармоқлардаги саҳфасида тасдиқлади.

"UFC билан яхши суҳбат бўлди. Мен уларга фақат камар учун жанг қилишимни айтдим! Кутиш керак бўлса, кутамиз. Бошқа айланма йўллар йўқ. Буюк нарсалар буюк тайёргарликни талаб қилади. Шак-шубҳа қилманг, мен тайёрман! Мен кутишга одатланмаганман, лекин бу сафар кутишга тўғри келади", - деб ёзди Имавов.

"Рамазондан кейин кўришамиз, Имомов. Сенда ўз курашинг устида ишлашинг учун вақтинг бор, ука!", - деб чорловша жавоб берди Чимаев.

Эслатиб ўтамиз, Хамзат Чимаев жорий йилнинг август ойида Лига байроғи остидаги тўққизинчи жангида жанубий африкалик Дрикус Дю Плессини ҳакамларнинг якдил қарори эвазига мағлуб этиб, ўрта вазнда янги UFC чемпионига айланганди. Нассурдин Имавов эса сентябрь ойида даъвогарлик жангида бразилиялик Кайо Борралльони очколар ҳисобига кўра енгиб, кетма-кет бешинчи ғалабасини қўлга киритганди.