Уч ҳафтада иккита жангда ғалаба қозонган "Salsa Boy"га ўзи сўраган рақибни беришди + ПОСТЕР

Сўнгги бир ойда катта шов-шув кўтарган Вальдо Кортес-Акостанинг навбатдаги жанги тафсилотлари маълум бўлди. Доминиканлик аралаш яккакураш устаси 2025 йил ҳисобидан 5 та жанг ўтказиб, 4 ғалаба ва 1 мағлубият қайд этди. Бу йилги ягона мағлубиятини россиялик Сергей Павловичдан қабул қилиб олган. 

Оғир вазн тоифасидаги Акоста 2026 йилнинг илк рақамланган турнири UFC 324 кардида жанг ўтказадиган бўлди. У чемпионлик камари учун собиқ даъвогар Деррик Льюисга қарши октагонга чиқади. Бу рақибни Акостанинг ўзи промоушен раҳбарларидан сўраганди.  

Оғир вазнлилар ўртасидаги ушбу жанг расман 24 январь куни АҚШнинг Лас-Вегас шаҳрида бўлиб ўтадиган UFC 324 турнири кардини тўлдирди. Шу йилнинг ноябрь ойида доминиканлик аралаш яккакураш учтаси иккита жанг ўтказиб, ҳар иккисини муддатидан аввал биринчи раундда техник нокаут билан якунлади. Дастлаб хорватиялик Анте Делия, кейин эса россиялик Шамил Газиев таслим этилди. 

Деррик Льюис эса Родриго Насименто ва Таллисон Тейшейрани техник нокаутга учратиб, муддатидан олдин ғалаба қозонди. Айни пайтда Кортес-Акоста ва Деррик Льюис ташкилотнинг оғир вазн тоифаси рейтингида мос равишда бешинчи ва саккизинчи ўринларни эгаллаб турибди.