ЎзДЖТСУда Маматқул Хайлаев хотирасига бағишланган шахмат мусобақаси ташкил этилди

Жойларда ушбу – кишидан юксак ақл-заковат, сабр-тоқат ва ирода талаб қиладиган спорт тури билан шуғулланиш учун яратилган шарт-шароитлар янада яхшиланмоқда. 

Хусусан, 2020/2021 ўқув йилидан бошлаб Ўзбекистон давлат жисмоний тарбия ва спорт университетида “5610545-Спорт фаолияти: шахмат» таълим йўналиши бўйича олий маълумотли кадрлар тайёрлаш тизими йўлга қўйилди.

Бугун Ўзбекистон давлат жисмоний тарбия ва спорт университетида ФИДE устаси, «Шуҳрат» медали соҳиби  Хайлаев Маматқул Жумаевич  хотирасига бағишлаб «Шахмат» спорт туридан мусобақа ташкил этилди.

Спортни бошқариш ва касбий фанлар факультетининг "Спорт менежменти ва иқтисодиёти" кафедраси ташаббуси билан ташкил этилган шахмат мусобақаси кўпчиликда катта қизиқиш уйғотди. Мусобақани университетнинг Ёшлар билан ишлаш бўйича проректори Ш. Мирзанов очиб берди. 

Швейцарча тизимда ўтган ва 5 турдан иборат мусобақада 50 нафарга яқин профессор-ўқитувчилар ва ёш иқтидор эгалари ғолиблик учун дона суришди.  

Мусобақа якунида 5 та имкониятдан 5 очко жамғарган Масъуд Мусаев ғолибликни қўлга киритди. II ўрин Хусан Мусулмановга, III ўрин Бахром Холиқовга насиб қилди. 

Тадбир сўнгида университетнинг Ўқув ишлар бўйича проректори И.Аҳмедов мусобақа ғолибларини тантанали равишда тақдирлади.

ЎзДЖТСУ матбуот хизмати