Пара-дзюдочиларимиз Осиё ва Океания чемпионатида умумжамоа ҳисобида биринчи ўринни эгалладилар

Мазкур мусобақада спортнинг ушбу тури бўйича қитъамизда энг кучли саналган давлатлар - Эрон, Жанубий Корея, Ҳиндистон, Ироқ, Тожикистон, Хитой Тайпейи, Таиланд, Қозоғистон ва XV Паралимпия ўйинлари якунларига кўра жаҳоннинг энг кучли жамоаси ҳисобланадиган Ўзбекистон терма жамоалари иштирок этдилар.

Терма жамоамиз аъзолари ушбу чемпионатда 9 та олтин, 2 та кумуш ва 7 та бронза медалларини қўлга киритиб, умумжамоа ҳисобида 1-ўринни эгаллашди. Иккинчи поғонадан 3 та олтин 3 та кумуш ва 3 та бронза медаллари билан Жанубий Корея терма жамоаси жой олган бўлса, Эрон терма жамоаси 2 та олтин 2 та кумуш ва 3 та бронза медалларига сазовор бўлиб, кучли учликка якун ясаб берди.