"Пахтакор"нинг ОЧЛдаги бош мураббийи Эмилиано Карас: "Пахтакор" эртага ғалаба олиб келадиган ўйин намойиш этади"

"Бир неча ой олдин Иордания футболи ҳақида ҳеч нарса билмас эдим. Иордания терма жамоасининг даражаси анча юқори экан. Жаҳон чемпионатида муносиб иштирок этишди. Адашмасам, "Ал Ҳуссайн"нинг 7 нафар ёки ундан кўпроқ футболчиси мундиалда иштирок этди. Иордания мундиалдаги ҳар бир ўйинда гол урди. Шунингдек, "Ал Ҳуссайн"нинг Кубок ва Чемпионатдаги натижаларини кузатиб бордим. Жамоа таркибида яхши футболчилар бор. Вазиятдан фойдаланиб, мухлисларни стадионга чорлаб қоламиз. Мухлисларнинг қўллаб-қувватлаши биз учун жуда муҳим", - дея гап бошлади "Пахтакор" мураббийи Эмилиано Карас. 

"Эртага осон ўйин бўлмайди. "Ал Ҳуссайн"нинг кўплаб футболчилари Жаҳон чемпионатида ўйнади. Биз тўрт кун олдин "Бухоро"га қарши ўйнадик. Иккита машғулот ўтказишга улгурдик, бири тикланиш учун ва иккинчиси тактик машғулот. Насиб эртага яхши натижага эриша оламиз. "Ал Ҳуссайн" ҳали янги мавсумда ўйин ўтказмади. Шунинг учун мураббийлар штаби рақибни ўрганишда бироз қийинчиликка дуч келган бўлиши мумкин", - дея фикр билдирди Башар Ресан. 

- Айман Ҳуссайнинг трансферида сизнинг иштирокингиз борми?
Башар Ресан: - Айман Осиёдаги энг яхши ҳужумчилардан бири. У мундиалда қандай ўйнаганини кўрдингиз. Мундиалга саралашда кўплаб гол урди ва мундиалнинг ўзида ҳам. У мендан Суперлига даражасини ва ҳаёт қандай эканлигини сўради. Мен Ўзбекистонда маҳаллий чемпионат кучлилигини айтдим. Ҳозир бир уч нафар ироқлик бир жамоада ўйнамоқдамиз. Биз "Пахтакор"га кўпроқ ёрдам беришимиз керак.

- "Пахтакор" иккинчи бўлимда жисмоний жиҳатдан қийналаётгандек. Эртага мана шу ҳолат яна такрорланишидан хавотир олмаяпсизми?
- Биз Суперлигада кўп очко йўқотдик. "Бухоро"га қарши сўнгги ўйинда барчаси яхши эди. Ўйинни назорат қилаётгандик. Мен буни жисмоний ҳолат билан боғламайман. Менимча, муаммо концентрацияда бўлди. Ўзингиз биласиз, 2:0 ҳисоби футболдаги энг ноқулай ҳисоблардан бири. Рақибнинг биринчи голини эса ўзингиз кўрдингиз. Шундан сўнг уларда руҳий устунлик ва иштиёқ пайдо бўлди. Биз яна шундай вазиятлар такрорланмаслиги устида ишлаяпмиз.

- Алижоновнинг ҳолати қандай? У эртанги учрашувда майдонга тушадими?
- У жамоавий машғулотларга қайтди, аммо чекловлар билан. Яккакурашларда ҳали иштирок этмаяпти. Унинг ҳолати кундан кунга яхшиланиб бормоқда. Бугун ва эртага ўйингача унинг ҳолатини яхшилаб олишимиз мумкин. Эртага якуний қарорни қабул қиламиз.

- Куни кеча эронлик футболчи "Пахтакор"га келади деган хабарлар тарқалди. Эртага эронлик легионер "Пахтакор" сафида дебют қилиши мумкинми?
- Клуб билан шартнома имзоланганидан сўнг расман эълон қиламиз.

- Эртага "Пахтакор" кўпроқ ҳужумкор ўйин намойиш этадими ёки ҳимоявий?
- Айнан қандай ўйин намойиш этишимизни аниқ айта олмайман. Ҳеч қайси бир жамоа майдонга ютқазамиз деб чиқмайди, буни биласиз. Ушбу босқич бир ўйиндан иборат. Бу эса жуда муҳим омил. Кўплаб ҳисобга олишимиз керак бўлган жиҳатлар бор, об-ҳаво. Эртага "Пахтакор" ғалаба олиб келадиган ўйин намойиш этади.

- "Пахтакор" сўнгги ўйинларда ҳисобда олдинга чиқиб олганидан сўнг хотиржамликка берилмоқда. Рақиб ҳам бундан аниқ хабардор. Эртага яна шу ҳолат такрорланмаслиги учун қандай ечим ўйлаб топдингизлар?
- Рақибимиз ўйиндан анча олдин Тошкентга келди. Сўнгги ўйинимизни стадиондан туриб кузатди. Улар бизни яхши ўрганиб чиқишган. Биз эса ўзимизнинг устунликларимиздан унумли фойдаланишга ҳаракат қиламиз. Масалан, "Ал Ҳуссайн" кўплаб янги футболчиларни ўз сафига қўшиб олди. Янги номлар ҳали жамоага тўлиқ қўшилиб кетмаган бўлиши мумкин. Ҳисобда олдинда бораётган жамоа ҳар доим хотиржамликка берилади. Бу руҳият билан боғлиқ. Фақатгина руҳият. Бундай вазиятда ҳисобни сақлаб қолиш эмас, уни янада йириклаштириш ҳақида ўйлаш керак. Шунингдек, яратаётган вазиятларимиздан ҳам фойдаланишимиз керак. Гол ўтказиб юборишимиз мумкин, фақат кўпроқ гол уришимиз керак.

- Телевизор орқали футбол томоша қилаётганимизда майдон ҳолати жуда ёмон. Футболчи сифатида майдоннинг ҳозирги ҳолатига баҳо бериб ўтсангиз?
Башар Ресан: - Аниқ сабабини билмайман. Тўрт ҳафта олдин майдон яхши ҳолатда эди. Бу яхши ҳолат эмас. Эртанги ўйинни "Пахтакор" учун эмас, ўзбек футболи учун томоша қилишади. Қолаверса, очиқ футбол ўйнайдиган жамоалар учун майдон ҳолати яхши бўлиши ўта муҳим. Эртага бундай камчиликларга эътибор бермай, фақатгина натижа ҳақида ўйлаймиз. Майдон ҳолати бизга ҳеч қандай муаммо туғдирмайди.