Пимблетт ўзини UFC'нинг янги лойиҳаси деб ҳисобламоқда

Енгил вазнда британиялик таниқли UFC жангчиси Пэдди Пимблетт (19-3) ўзини промоушенда томошабинларни жалб қилиш ва пуллик трансляцияларни сотиш бўйича янги муваффақиятли лойиҳа деб ҳисоблайди.

"Одамлар мен ҳақимда атрофида фақатгина хайп бор, UFC уни реклама қиляпти деб ўйлашади. Аслида ундай эмас, мен шунчаки энг яхши контентни кўрсатаман ва UFC бундан фойдаланади. Кўп одамлар мени томоша қилади, мен пули бор янги "сигир"ман. 

Жаред билан жангдан кейин одамлар қуруқ хайп ҳақида гапиришни тўхтатадилар, чунки мен унга қарши ҳақиқий шоу кўрсатаман. Мен ундан бир неча поғона юқорида эканлигимни кўрсатмоқчиман. Ҳаммаси шу!", - деди Пимблетт UFC YouTube каналига берган интервьюсида.

Пэдди Пимблетт UFC'да учта жанг ўтказиб, уларнинг барчасида ғалаба қозонган. Британиялик жангчи сўнгги бор 23 июлда Жордан Левитт (9-2)га қарши октагонга кўтарилиб, ғолиб бўлган эди. Унинг навбатдаги жанги 10 декабрь куни Лас-Вегасда Жаред Гордон (18-5)га қарши бўлиб ўтади.