Президент шахматчиларимизни тақдирлаб, Янги Тошкентда 500 ўринли шахмат саройи қуришни таклиф қилди

Тадбир давомида Президент Шавкат Мирзиёев Янги Тошкентда 500 ўринли замонавий шахмат саройи қуришни таклиф қилди. Унда ўйин зали билан бирга ётоқхона ва спорт майдончалари ҳам бўлиши режалаштирилмоқда. Ўзбекистонда ёш шахматчиларни тайёрлаш тизимини кенгайтириш ҳам кўзда тутилган. Тақдим этилган маълумотга кўра, Самарқанд, Хоразм ва Фарғонада Тошкент халқаро шахмат академиясининг филиаллари очилади.

Академияда юқори тоифали шахмат мураббийларини тайёрлаш тизимини ҳам йўлга қўйиш режалаштирилган. Президент аввалроқ мамлакатда шахматни янада ривожлантириш бўйича янги қарор қабул қилинганини маълум қилган эди.

Шунингдек, FIDE рейтинги 1500 баллдан юқори бўлган шахматчиларнинг хусусий клублардаги машғулот харажатларининг 50 фоизини давлат ҳисобидан қоплаш назарда тутилган. Мамлакатда «Ўзбекистон Grand Chess» миллий бренди остида халқаро турнирларни мунтазам ташкил этилиш режалаштирилмоқда. Бу орқали маҳаллий шахматчиларга кучли хорижий рақиблар билан Ўзбекистоннинг ўзида беллашиш имкониятини кенгайтириш кўзда тутилган.

Аввалроқ, Самарқандда ўтказилган 46-Бутунжаҳон Шахмат Олимпиадасида Ўзбекистон эркаклар терма жамоаси чемпион бўлган эди. Президент жамоа аъзоларини 200 минг АҚШ доллари, Volkswagen автомобили ҳамда уй билан тақдирлади.