Президент топшириғи юзасидан ҳудудларга ташриф: МОҚ раҳбарияти Бухоро вилоятида

Бу борада Ўзбекистон МОҚ Бош котиби Ойбек Касимов ҳамда МОҚ раиси ўринбосари, Ўзбекистон бокс федерацияси раисининг биринчи ўринбосари Сакен Полатов бошчилигидаги мутасаддилар Бухоро вилоятида амалга оширилаётган ишлар билан яқиндан танишишди.

Мутасаддиларнинг айнан ушбу вилоятга ташриф буюриши бежиз эмас. Сабаби, видеоселекторда давлатимиз раҳбари селекция ишларини янада кучайтириш, спорт таълим муассасалари фаолиятини яхшилаш бўйича Бухоро вилояти мисолида аниқ йўналиш кўрсатиб берган. 

Сафар давомида ишчи гуруҳ вилоят Олимпия захиралари коллежида спорт федерациялари, шунингдек, БЎСМ ва ИБЎСМларда фаолият олиб бораётган мураббийлар билан учрашув ўтказди. Унда қуйи бўғиндан – болалар спортидан уларни профессионал спортчи даражасида тайёрлаш босқичигача бўлган тизимни қандай шакллантириш, уларни тайёрлашда малакали тренерларни, ҳакамлик корпусини ривожлантириш бўйича фикр алмашишди.

Ўз навбатида, мутасаддилар иқтидорли ёшларни селекция қилишнинг янги механизмини йўлга қўйиш бўйича мулоҳазани ўртага ташлашди. Бунда туман ва шаҳарлар, секторлар миқёсида махсус мусобақалар ташкил этиш, уларда сараланган спортчилар кейинчалик вилоят, сўнг Республика чемпионатларида иштирок этиши ҳақидаги мисоллар келтириб ўтилган. Учрашув якунида маҳаллий мутахассислар янги механизм ташаббусини қўллаб-қувватлаб, уни янада такомиллаштириш бўйича ўз таклифларини билдиришди.

Ўзбек бокси юлдузларидан бири Аббос Атоевнинг бокс мактабига ташриф ҳам МОҚ раҳбарларида катта таассурот қолдирди. Яқинда фойдаланишга топширилган дзюдо зали, божхона бошқармасига қарашли спорт майдони ҳам кўздан кечирилди.

Куннинг иккинчи қисмида эса байдарка ва каноэ мажмуаси, Болалар ва ўсмирлар спорт мактаблари, шунингдек, Ихтисослаштирилган болалар ва ўсмирлар спорт мактаблари ва яна бир қатор спорт объектларига ташриф амалга оширилди.

Кечга яқин МОҚ раҳбарияти вакиллари маҳалла қизлари ўртасида чим устида хоккей бўйича Бухоро вилояти прокурори кубогининг финал учрашуви ва тақдирлаш маросимида иштирок этдилар. Ўша ернинг ўзида чим устида хоккейга мўлжалланган аренани вилоят ёшлари учун қайта таъмирлаш бўйича фикр алмашишди.