Qatar Masters. Кучли гроссмейстерни мағлуб этган Абдусалимов 5-ўринга кўтарилди, Нодирбекларнинг бирида дуранг, иккинчисида ғалаба

Мукофот жамғармаси 94 200 АҚШ долларини ташкил қилувчи Qatar Masters турнирида жами 53 нафар ўзбекистонлик шахматчи А ва В гуруҳида баҳс олиб боряпти. Кучлилар жам бўлган Open турнирида 15 нафар шахматчимиз совринли ўринлар учун курашяпти. 

Турнирда иккинчи рақам остида таснифланган Нодирбек Абдусатторов (2777) кетма-кет учта ғалабадан кейин дуранг ўйнади. У 6-турда қора доналарда болгариялик гроссмейстер Аркадий Найдич (2636) билан муросага келди. Яна бир гроссмейстеримиз Нодирбек Якуббоев (2668) оқ доналарда FIDE байроғи остида қатнашаётган россиялик гроссмейстер Иван Землянский (2543)ни мағлубиятга учратди. Шамсиддин Воҳидов (2681) оқ доналарда италиялик Лоренцо Лодики (2564) билан дуранг ўйнади. 

Қувонарлиси, ёш гроссмейстеримиз Абдумалик Абдусалимов (2536) оқ доналарда арманистонлик гроссмейстер Гаик Мартиросян (2656)ни таслим этди. Абдумалик ўтган турда қора доналарда ўйнашига қарамай, Тошкентда ўтган "Президент Кубоги" турнири ғолиби Ниҳал Сарин (2676)дан очко тортиб олганди. Ёшлар ўртасида жаҳон чемпиони Афруза Ҳамдамова (2354) ҳиндистонлик Адитя Дҳингра (2448) билан дуранг қайд этди. 

Олтинчи турда ёш гроссмейстеримиз Муҳиддин Мадаминов қора доналарда ҳаракат қилганига қарамай, таниқли ҳинд гроссмейстери Нараянан (2647)дан устун келди. Бу турда шахматчиларимиздан Муҳаммадзоҳид Суяров, Ортиқ Ниғматов, Ҳумоюн Бегмуратов ва Асроржон Омонов ғалабага эришди. Саидакбар Сайдалиев, Баҳром Бахриллаев ва Муҳаммадали Абдураҳмонов рақиблари билан дурангга имзо чекишди. Алмас Раҳматуллаев ва Нилуфар Якуббоева эса мағлубият аламини тотиб кўрди. Нилуфар барча олти учрашувда рақибларига ютқазгани эътиборга молик ҳолат. 

Еттинчи тур олдидан арманистонлик гроссмейстер Шант Саргсян 5,5 очко билан якка пешқадам бўлиб олди. Россиялик Андрей Есипенко 5 очко билан қўшимча коэфицентларга кўра иккинчи ўринни эгаллаб турибди. Ҳиндистонлик Аржун Эргаиси ва БАА вакили Салем Салеҳ ҳисобида ҳам 5 очкодан бор. Ҳамюртимиз Абдумалик Абдусалимов 4,5 очко тўплаган 6 шахматчи орасида энг яхши натижа билан 5-ўринга кўтарилиб олди. Муҳиддин Мадаминов ва Нодирбек Якуббоев ҳисобида ҳам 4,5 очко бўилб, улар мос равишда 7 ва 9-ўринлардан жой олишган. Тўрт очкодан жамғарган Шамсиддин Воҳидов ва Нодирбек Абдусатторов мос равишда 16 ва 28-ўринни эгаллаб турибди.