Қатар "Мастерс". Шарофиддин ва Ҳикматуллоҳ кучли рақибларини енгишди

Бироз аввал Ҳикматуллоҳ Тўраев ҳамюртларимизнинг бугунги иштирокини муваффақиятли бошлаб берди. 

-73 кг вазн тоифасидаги дзюдочимиз биринчи босқичда Бирлашган Араб Амирликлари вакили Виктор Скворцовни вазари баҳоси эвазига мағлубиятга учратди. Энди Сурхон ўғлони иккинчи даврада мўғулистонлик Тсогбаатар Тсенд-Очирга қарши татамига чиқади. Мўғул дзюдочиси илк даврада германиялик Энтони Зинггдан устун келди.   

-81 кг вазн тоифасидаги дзюдочимиз Шарофиддин Болтабоев ҳам Қатар "Мастерс" турниридаги иштирокини ғалаба билан бошлади.

Қорақалпоғистонлик дзюдочимиз иштирокини тўғридан-тўғри иккинчи босқичдан бошлади ва унда қозоғистонлик кучли рақиби Дидар Ҳамзани вазари баҳоси эвазига мағлубиятга учрата олди. Бироздан сўнг Шарофиддин нимчорак финал беллашувида мўғулистонлик Ууганбаатар Отгонбаатарга қарши баҳс олиб боради. Бу мўғул дзюдочиси аввалига россиялик жаҳон чемпиони Хасан Халмурзаевни, кейин эса канадалик Энтони Валоис-Фортиерни таслим этди.