Қиличбозларимиз "Spark" ва “Cobalt” автомобиллари билан тақдирланишди+ФОТО

Вакилларимиз мусобақанинг жамоавий баҳсларида кумуш ва бронза медалларини қўлга киритиб, ўзбек қиличбозлиги тарихида янги саҳифа очишга муваффақ бўлишди. Зеро, шу пайтга қадар қилич (сабля) йўналишида ҳамюртларимиз Осиё миқёсида бирорта медалга эга чиқа олишмаганди. Бугун мусобақада иштирок этган қиличбозларимиз Ўзбекистонга қайтиб келишди.

Спортчилар Ислом Каримов номидаги Тошкент халқаро аэропортида тантанали тарзда кутиб олинди. 

Уларни қарши олиш учун кўплаб мухлислар, спортчиларнинг яқинлари, ОАВ вакиллари аэропортда жам бўлишди. Тадбир қаҳрамонлари учун махсус автобуслар ажратилганди. 

Улар сайёхлик автобусларида Тошкент кўчалари бўйлаб навбатдаги манзил – “Пахтакор” стадиони томон йўл олдилар. У ерда Осиё чемпионати совриндорлари ва уларнинг устозларини тақдирлаш учун тадбир ташкил этилди.

Тантанали тадбирда Ўзбекистон Миллий олимпия қўмитаси Президенти Умид Аҳмаджонов, Ўзбекистон Жисмоний тарбия ва спорт вазири Шоакрам Исроилов, Ўзбекистон қиличбозлик федерацияси раиси Рустам Шоабдураҳмонов, федерация бош котиби Муҳаммад Ҳумоюн Ибрагимовлар иштирок этишди. 

МОҚ раҳбари спортчиларни табриклар экан, ушбу муваффақият билан спортчилар тўхтаб қолмасликларини, келажакда Осиё ва Олимпия ўйинларида ҳам муваффақиятли натижа кутиб қолишини айтиб ўтди.

Тадбир давомида шунингдек Жисмоний тарбия ва спорт вазири Шоакрам Исроилов, Ўзбекистон қиличбозлик федерацияси раиси Рустам Шоабдураҳмоновлар ҳам сўзга чиқиб, қиличбозларимизни ушбу муваффақият билан табриклашди.

Шундан сўнг Осиё чемпионати совриндорлари ва уларнинг устозларига махсус совға – “Spark” ва “Cobalt” автомобиллари калити топширилди. Аниқроғи, жамоавий баҳсларда кумуш ва бронза медалларини қўлга киритган ҳар бир спортчига “Spark”, уларни тарбиялаган устозларига эса “Cobalt” автомобиллари тортиқ этилди.

Қиличбозларимиз учун навбатдаги халқаро мусобақа якунланди. Аммо олдинда ҳамюртларимизни бундан-да нуфузли, бундан-да масъулиятли беллашувлар кутиб турибди. Навбатдаги манзил эса Жакарта.