Қизларимиз FIDE Жамоавий жаҳон чемпионатининг 1/4 финалида бошдан баланд сакрай олишмади

“World Women’s Team Championship 2025” мусобақасида 12 давлат терма жамоалари ўз иштирокини бошлаган эди. Ўзбекистон аёллар терма жамоаси “В” гуруҳида Грузия, Хитой, Ҳиндистон, Франция ва Украина жамоаларига қарши баҳс олиб борди. 

Грузия, Хитой, Ҳиндистон терма жамоаларига имкониятни бой берган шахматчи қизларимиз Франция ва Украинадан устун келишди. Ўтказилган 5 тур якунига кўра жамоамиз гуруҳда 4-ўринни эгаллаб, нокаут босқичига йўлланма олганди.

Афсуски, 1/4 финалда қизларимиз мусобақа фаворитларидан бири "А" гуруҳи ғолиби FIDE байроғи остида ўйнаётган Россия терма жамоасига ҳар икки учрашувда ҳам 0,5:3,5 ҳисобида имкониятни бой бериб, Жамоавий жаҳон чемпионатидаги иштирокини якунлашди. 

1/4 финал натижалари:

1-учрашувлар. FIDE (Россия) – Ўзбекистон 3.5:0.5, АҚШ – Хитой 3:1, Озарбайжон – Грузия 2:2, Қозоғистон – Ҳиндистон 3:1.

2-учрашувлар. FIDE (Россия) – Ўзбекистон 3.5:0.5, АҚШ – Хитой 1:3, Озарбайжон – Грузия 2.5:1.5, Қозоғистон – Ҳиндистон 1.5:2.5.

Тай-брейк. АҚШ – Хитой 0.5:3.5, Қозоғистон – Ҳиндистон 2,5:1.5.

1/2 финал жуфтликлари. Россия – Хитой, Озарбайжон – Қозоғистон.

Ўзбекистон аёллар терма жамоаси таркиби:

Гулруҳбегим Тоҳиржонова 2369

Умида Омонова 2289

Гулдона Каримова 2286

Мадинабону Халилова 2228

Нафиса Мўминова, терма жамоа менежери, жамоа раҳбари.