Қорақалпоғистонда қиличбозлик бўйича турнир давом этмоқда

Ушбу турнирда 2003 ва ундан кейин туғилган спортчилар иштирок этмоқдалар. 14 мартгача давом этадиган баҳсларда қиличбозликнинг барча йўналишлари бўйича ғолиб ва совриндорлар номи маълум бўлади.

Мусобақада Республикамизнинг турли худудларидан 112 нафар спортчи совринли ўринлар учун кураш олиб бормоқда. Ҳозирча шпага бўйича ўғил болалар ва қизлар ўртасида яккалик баҳслари якунига етди.

Ўғил болалар ўртасида Андижон вилояти вакили Мирзо-Улуғбек Мўминов барча рақибларини мағлубиятга учратиб, биринчи ўринни қўлга киритди. Бухоро вилояти вакили Авезбек Наимов иккинчи ўрин соҳибига айланди. Учинчи ўринлар Жасур Сатторов (Бухоро) ва Самандар Ғуломжонов (Андижон) ларга насиб қилди.

Қизлар ўртасида ўтказилган баҳсларда эса Тошкент шаҳри вакили Асал Раҳиммирзаева олтин медаль соҳибига айланди. Иккинчи ўринни эса Андижон вилоятидан ташриф буюрган Ойдин Абдулазизова эгаллади. Учинчи ўринни Гуля Раимқулова (Тошкент) ва Мухлиса Одилова (Андижон) қўлга киритди.