Қозоғистонлик теннисчи Монпельедаги турнир чемпиони бўлди

Мусобақа бош соврини қозоғистонлик Александр Бубликка насиб этди. Дунёнинг 27-ракеткаси бўлиб келган Бублик ҳал қилувчи финал учрашувида ATP рейтингида ўзидан 10 поғона қуйида бораётган хорватиялик Борна Чорични 5:7, 6:2, 6:3 ҳисобларида мағлубиятга учратди.

Икки соату 18 дақиқа давом этган баҳсда Александр 19 та, Борна эса 5 та эйс зарбасини амалга оширган. Бу 26 ёшли Бублик учун фаолиятидаги тўртинчи ATP соврини бўлди. Қозоғистон вакили Монпелье турнирида 2022 йилда ҳам чемпион бўлганди. Ўшанда у финал баҳсида германиялик Александр Зверевдан устун келган эди.