Рафаэль Физиев жанг санаси ва рақибини эълон қилди

Физиевнинг айтишича, унинг жанги март ойида бўлиб ўтади ва у дивизионнинг собиқ вақтинчалик чемпиони, айни пайтда рейтингнинг учинчи поғонасида бораёган Жастин Гэтжига қарши октагонга кўтарилади. 

"Атаман"нинг америкаликка қарши жанги 4 март куни Лас-Вегасда ўтказиладиган UFC 285 ёки 18 март санасида Лондон шаҳри мезбонлик қиладиган UFC 286 турнирида бўлиб ўтади. 

"Менга UFC ташкилотидан қўнғироқ қилиб, март ойида Жастин Гэтжига қарши жанг ўтказасан, тайёргарлигингни бошла деб айтишди. Бу жанг Дана Уайтга ҳам қизиқ. Тез кунда шартномага имзо чекаман. Вегас ёки Лондон", - дея Captain Hardcore каналига интервью берган Физиев. 

Эслатиб ўтамиз, ўтган йилнинг июль ойида Рафаэль бразилиялик адаши Рафаэль Дос Аньосни бешинчи раундда нокаутга учратиб, UFC октагонидаги ғалабасини сериясини олтитага етказиб олганди. Жастин Гэтжи эса май ойида ўша пайтдаги UFC чемпиони Чарльз Оливейрага имкониятни бой берган эди. Бразилиялик жангчи биринчи раунднинг ўзида Жастинни бўғиб қўйганди.