Рақамланган UFC 320 турнири карди яна бир жанг билан тўлдирилди

Кардидан иккита чемпионлик жанги ўрин олган турнирнинг яна бир қарама-қаршилиги эълон қилинди. Ярименгил вазн тоифаси рейтингида саккизинчи ўринни эгаллаб турган америкалик Жош Эмметт ўзидан бир поғона қуйида бораётган марокашлик Юссеф Залалга қарши октагонга чиқади. Бу ҳақда Шанхайда ўтган UFC Fight Night 257 турнири доирасидаги матбуот анжуманида хабар берилди. 

Маълумот учун, 40 ёшли Жош ҳисобида 19 ғалаба ва 5 мағлубият бор. Жангларининг тўққизтасини муддатини аввал якунлаган. Эмметт профессионал ММАдаги дебют жангини 2011 йилнинг октябрида ўтказган. 28 ёшли Юссеф эса ММАда 17 ғалаба, 5 мағлубият ва 1 та дуранг қайд этган. Залал 2017 йилнинг август ойидан бери аралаш яккакурашчи сифатида жангларини ўтказиб келяпти. 

Эслатиб ўтамиз, UFC 320 турнирининг асосий жанги яримоғир вазн тоифасида амалдаги UFC чемпиони россиялик Магомед Анкалаев ҳамда ушбу камарнинг собиқ соҳиби бразилиялик Алекс Перейра ўртасида бўлиб ўтади. Бу Перейра учун реванш мақомидаги жанг бўлади. Оқшомнинг co main-event жанги ҳам камар учун кечади. Ўта енгил вазнда UFC чемпиони грузиялик Мераб Двалишвили ўз титулини рейтингнинг тўртинчи поғонасида бораётган америкалик Кори Сэндҳагендан ҳимоя қилади.