Расман: Ботир Аҳмедов WBA чемпионлик камари учун даъвогарлик жангида рингга чиқади, рақиб ва жанг санаси ҳам аниқ

Супер енгил вазн тоифасида (63,5 кг) жанг қилувчи 32 ёшли ўзбекистонлик боксчи Ботир Аҳмедов (9-2) 13 май куни Лас-Вегасда жойлашган The Chelsea at the Cosmopolitan of Las Vegas аренасида ташкил этилаётган бокс оқшомида рингга кўтарилади.

Аҳмедовга ўша куни америкалик 29 ёшли чарм-қўлқоп устаси Кеннет Симс Жуниор (19-2-1) рақиблиқ қилади. Жанг супер енгил вазн тоифасида WBA чемпионлик камарига мажбурий даъвогарлик (Eliminator) мақомида ўтади. Боксчилар ўртасидаги тўқнашув 12 раунд этиб белгиланган.

Қайд этиш жоиз, мазкур вазнда WBA чемпионлик камари айни дамда доминиканлик Альберто Пуэлльога тегишли бўлиб турибди. Пуэлльо мазкур оқшомнинг марказий жангида WBA камарини илк бор ҳимоя қилади, унга Роландо Ромеро рақиблиқ қилади.

Эслатиб ўтамиз, Ботир Аҳмедов 2022 йил 21 август куни Флоридада (АҚШ) ташкил этилган бокс оқшоми доирасида WBA камари учун Альберто Пуелльога қарши рингга чиқиб, очколар ҳисобига (115:113, 111:117, 111:117) мағлуб бўлган эди.