Расман: Бразилия терма жамоасида истеъфо!

"Бразилия футбол конфедерацияси Доривал Жуниор эндиликда Бразилия миллий терма жамоасига бош мураббийлик қилмаслигини маълум қилади. Раҳбарият мураббийга келгуси фаолиятига омад тилайди. Айни дамда ташкилот миллий терма жамоа учун мураббий излаш ишларини бошлаб юборган", - деб ёзилади баёнотда.

Бразилия термаси март ойидаги ФИФА кунларида ЖЧ-2026 саралаш босқичи доирасида Колумбияни 2:1 ҳисобида мағлуб этди. Кейин Аргентинага йирик 1:4 ҳисобида имкониятни бой берди. Раҳбарият ушбу мағлубиятга қадар ҳам мураббийнинг ишидан қониқиш ҳосил қилмаётган эди.

Бразилиялик мутахассис 2024 йил январь ойида терма жамоа бошқарувини қўлга олганди. Шундан буён унинг мураббийлигида терма жамоа 16 ўйинда 7 тадан ғалаба ва дуранг, шунингдек 2 та мағлубият қайд этди. Америка Кубогида унинг жамоаси чорак финалдаёқ иштирокини якунлади.