Расман: Драган Черан — "Андижон" футболчиси!

"Ўзбекистон чемпионатида тўп тепиб, энг яхши легионерлардан бири бўлиб келган тўпурар Драган Черан билан шартнома имзоланди. У ортда қолган мавсумни “Насаф” сафида ўтказди.

Маълумот учун, Драган 1987 йилнинг 6 октябрь куни Сербияда таваллуд топган. Тажрибали футболчи фаолияти давомида “Смедерево 1924” (Сербия), “Пожаревас” (Сербия), “Вестерло” (Белгия), “Хапоэл Хайфа” (Исроил), “Маккаби Нетания” (Исроил), “Симург” (Озарбайжон), “Хаджер” (Саудия Арабистони), “Вардар” (Македония), “Пахтакор” ва “Насаф” клубларида тўп сурган. 

Чераннинг юртимиздаги фаолияти 2016 йилдан бошланган. У 2019 йилдан 2024 йилгача кетма-кет 6-марта Ўзбекистон чемпионати тўпурарига айланган. Бу борада Черан Ўзбекистон чемпионатида мутлақ рекордчи саналади. 

Драган фаолияти мобайнида шу пайтгача 538 та ўйинда майдонга тушиб 239 та гол урган ва 57 та голли узатмани бажарган. 

Жумладан, Суперлигада 226 ўйинда рақиблар дарвозасига 147 та тўп киритган.

Шунингдек, Черан 5 карра Ўзбекистон чемпиони, 3 карра Суперкубок ғолиби ва 2-марта Кубок соҳибига айланган", – дейилади хабарда.

Аввалроқ у "Андижон" таклифини қабул қилмагани ва "Сўғдиёна"га ўтаётгани ҳақида хабар чиққан эди.