Расман! UFC Алекс Перейра - Исраэль Адесанья реванш жангини тасдиқлади

Ўрта вазн тоифасида UFC чемпиони, бразилиялик Алекс Перейра (7-1) ҳамда собиқ чемпион Исраэль Адесанья (23-2) ўртасидаги реванш жанги қачон ва қаерда ўтказилиши маълум бўлди.

Унга кўра, мазкур жанг 8 апрель куни UFC 287 турнири доираисида бўлиб ўтади. Мусобақа Майами (АҚШ)да ташкил этилиши хабар қилинган. Шунингдек, ушбу жангни UFC News нашри ҳам тасдиқлади. Перейра - Адесанья қарама-қаршилиги UFC 287 мусобақасининг марказий жанги бўлади.

Ҳозиргача UFC 287 турнири кардидан Роб Фонт - Адриан Янез, Рауль Росас - Кристиан Родригес каби жанглар ўрин олган.

Маълумот учун, Алекс Перейра ва Исраэль Адесанья ўртасидаги UFC'даги илк жанг UFC 281 мусобақаси доирасида ўтказилган эди, мазкур жангда Перейра муддатидан аввал ғалаба қозониб, ўрта вазн тоифасидаги чемпионлик камарини қўлга киритган эди.

Перейра ва Адесанья бунгача Glory промоушенида ҳам икки бор тўқнаш келган ва уларнинг ҳар иккисида Перейра ғолиб бўлган.