Расман! Юбилей UFC 300 турнирининг санаси ва манзили тасдиқланди

Ташкилот томонидан тақдим этилган расмий пресс-релизда юбилей UFC 300 турнири 2024 йилнинг 13 апрель куни АҚШнинг Невада штати Лас-Вегас шаҳридаги муҳташам T-Mobile аренада ўтказилиши ўз тасдиғини топди.

Ҳозирча ушбу турнирнинг ҳеч бир жанги расман эълон қилинмаган. Шундай бўлса-да, UFC президенти Дана Уайт мухлислар прелим карднинг илк жангидан бошлаб завқ ола бошлашларини кафолатламоқда.  

Шунингдек, Дана бўлажак мусобақада лига фахрийси, UFC 100 ва UFC 200 турнирларида октагонга кўтарилган ягона жангчи Жим Миллернинг ҳам иштирок этишини тасдиқлади.

Маълумот учун, 2009 йилда ўтказилган UFC 100 турнирининг асосий жанги оғир вазн тоифаси чемпионлиги учун Брок Леснар ҳамда Фрэнк Мир ўртасида ташкил этилганди. 2016 йилда бўлиб ўтган UFC 200 турнирининг марказий жанги эса аёллар енгил вазн тоифаси камари учун Аманда Нунес ҳамда Миша Тейт ўртасида кечганди. Аслида ўша оқшомда МакГрегор – Диас 2 ва Жонс – Кормье 2 жанглари ўтказилиши керак эди. Аммо маълум сабабларга кўра бу икки жанг бекор бўлганди.

Айрим тасдиқланмаган хабарларга кўра, UFC 300 турнирининг марказий жанги ярим ўрта вазнда Конор МакГрегор ҳамда Майкл Чендлер ўртасида ўтказилиши мумкин.