Райан Гарсиянинг жанги бекор қилинди

У шу куни Япония пойтахтида RIZIN промоушени томонидан ташкил этилаётган турнирда мезбонлар вакили Руки Анпога қарши кўргазмали мақомга эга жангда рингга чиқиши керак эди. Жангнинг бекор қилинишига жароҳат сабаб бўлди. Ташкилотчилар жангни 2025 йилнинг январь ёки февраль ойида ўтказишни режа қилишяпти.

"Мен сўнгги бир неча ҳафта мобайнида бу жангга Даллас шаҳрида астойдил тайёргарлик кўраётгандим. Афсуски, машғулот чоғида қўлимни шикастлаб олдим. Тиббий кўрикдан ўтиш учун Лос-Анжелесга қайтдим. Шифокорим жангни кечроқ муддатга қолдиришимни сўради. Мухлислардан узр сўрайман. Қўллаб-қувватлаб турганингиз учун раҳмат. Ишонинг, менчалик ҳеч ким бу жангнинг қолдирилишидан изтироб чекмаяпти", — деди Гарсия ўзининг ижтимоий тармоқдаги мурожаатида. 

Ташкилотчилар ноябрь ойининг охирларида 26 ёшли Гарсия ҳамда 29 яшар Анпонинг 2 дақиқадан иборат 8 раундлик жангини расман эълон қилишганди. Ушбу жанг 69,4 кг вазн тоифасида ўтказилиши керак эди.