"Реал" Винисиусга нисбатан ирқчилик ҳақоратлари иши бўйича УЕФАга далилларни топширди

Ҳодиса 17 февраль куни Лиссабонда Чемпионлар Лигасидаги илк плей-офф ўйинида "Бенфика"га қарши баҳс (1:0) вақтида содир бўлди.

Клуб хабарида таъкидланишича, УЕФАга Португалия пойтахтидаги стадионда бўлиб ўтган воқеа билан боғлиқ барча мавжуд материаллар ва далиллар аллақачон тақдим этилган. "Реал" Европа футбол ташкилоти билан бошланган тергов доирасида фаол ҳамкорлик қилаётганини билдирган.

Шунингдек, баёнотда футбол жамоатчилигига Винисиусни қўллаб-қувватлагани учун алоҳида миннатдорлик билдирган. Клуб бутун дунё бўйлаб футболчилар, жамоалар ва мухлислар томонидан кўрсатилган ҳамжиҳатликни қадрлашини таъкидлаган.

Мадридликлар спортда ҳам, спортдан ташқарида ҳам ирқчилик, зўравонлик ва нафратга қарши курашиш учун тегишли институтлар билан ҳамкорликни давом эттириш нияти борлигини ҳам тасдиқлаган.

УЕФА тақдим этилган материалларни ўрганиб, регламентда белгиланган тартибда тергов якунларига кўра қарор қабул қилади.