Роналду "Ал-Насср" раҳбариятига шарт қўйди

Манба маълумотига кўра, португалиялик юлдуз клубнинг трансфер сиёсатидаги ҳолатдан норози. Унинг фикрича, масъуллар жамоа таркибини кучайтиришга қасддан эътибор қаратмаяпти ҳамда ресурсларни "Ал-Ҳилол"ни қўллаб-қувватлашга йўналтириб, жамоанинг чемпионликни қўлга киритишини таъминлашга уринмоқда.

Роналду бундай ҳолатга тоқат қилмаслигини билдириб, ўзгаришлар энг яқин трансфер ойнасидаёқ амалга оширилишини талаб қилган. Акс ҳолда, у Саудия Арабистонини тарк этишга тайёрлигини айтган.

"Агар ёзги трансфер даврида талабларим бажарилмаса, мен кетаман", — дея таъкидлаган Роналду.

Қайд этилишича, футболчининг "Ал-Насср"да фаолиятини давом эттириши учун асосий шарт — жамоа таркибини ҳақиқий кучайтириш ва жамғарма раҳбарияти томонидан клубларга нисбатан тенг муносабат таъминланиши ҳисобланади.

Аввалроқ португалиялик футболчи ўз клубининг икки ўйинини бойкот қилгани ҳақида хабарлар тарқалган эди.