Россияга нисбатан навбатдаги санкция: Фристайл бўйича Жаҳон кубоги ҳам бекор қилинди

26-27 февраль кунлари Челябинск вилоятида бўлиб ўтиши керак бўлган фристайл бўйича Жаҳон кубоги босқичи хорижлик спортчиларнинг мусобақада иштирок этишдан бош тортгани учун ўтказилмайди.

"Челябинск вилоятига келган спортчилар турнирга тайёргарлик сифатини яна бир бор юқори баҳолаб, мамлакатни тарк этишга мажбур бўлаётганликлари ва мусобақаларда иштирок этмасликлари учун чуқур афсусда эканликларини билдиришди.

Ўз навбатида, Челябинск вилояти Жаҳон кубоги босқичи ташкилотчиси сифатида ёрқин спорт воқеаси бўлиб ўтмаслиги ҳақидаги хабарни афсус ва хафсала билан кутиб олди. Ишончимиз комилки, спорт доимо сиёсатдан четда қолиши керак. Афсуски, ҳамма ҳам бу позицияни баҳам кўрмайди. Қизиқарли мусобақалар ва ҳақиқий спорт байрамини кўришга ҳозирлик кўраётган мухлисларга ҳамдардмиз. Харид қилинган чипталар учун пул қайтарилади", - дейилади ташкилотчилар расмий баёнотида.

Эслатиб ўтамиз, Россиянинг Украина ҳудудига бостириб кириши оқибатида Россияда ўтиши режалаштирилган кўплаб мусобақалар бекор қилинмоқда.