Рублёв Новак Жоковични ўз уйидаги турнир финалида мағлуб этди

Бироз аввал турнирнинг финал учрашуви якунланди. Бош соврин учун кечган баҳсда сайёрамизнинг биринчи ракеткаси Новак Жокович АТР рейтингида 8-ўринни эгаллаб турган россиялик Андрей Рублёвга қарши кортга чиқди. 

Икки соату 29 дақиқа давом этган учрашувда чемпионлик тақдири уч сет натижасига кўра ҳал бўлди. Биринчи сетда Рублёв рақибига 2 та геймни бой бериб, 6/2 ҳисобида ғалаба қозонди. Иккинчи сетда эса теннисчилар тай-брекка мурожаат қилишди. Лотереяда омад мезбон теннисчига кулиб боқди - 7/6 (7/4). 

Ҳал қилувчи учинчи сетда Андрей Новакка ўзининг бирорта геймини ютқазмади ва аксинча, рақибининг 3 та геймини ютиб олди - 6/0. Рублёв жаҳоннинг биринчи ракеткасини ўз уйидаги турнирда мағлуб этиб, фаолиятидаги 11-унвонини қўлга киритди.  

Теннисчиларнинг ўзаро учрашувларидаги ҳисоб эса тенглашди – 1:1. Serbia Open чемпионлиги учун Рублёв 250 рейтинг очкоси ва 81 310 евро мукофот пулига эга бўлади. Жокович эса 150 очко ва 47 430 евро олади.