20 май 13:29
Янгиликлар

Бокс/ММА

Саидёқуб Қаҳрамонов Жон Жонсга тегишли Лигада UFC вакили билан жанг қиладиган бўлди + ПОСТЕР

Ўзбекистонлик аралаш яккакураш устаси, энг енгил вазн тоифасида UFC собиқ жангчиси Саидёқуб Қаҳрамоновнинг навбатдаги жанги бўйича тафсилотлар маълум бўлди.

29 яшар ҳамюртимиз Тошкент вақти билан 15 июнь куни АҚШнинг Флорида штати, Майами шаҳрида жойлашган The Hangar at Regatta Harbour мажмуасида ташкил этиладиган DBX 2 мусобақаси доирасида рингга чиқади. Боиси, мусобақага ташриф буюрган мухлислар махсус қоидалар асосидаги бокс беллашувларини томоша қилишади.

Қаҳрамоновга турнир доирасида америкалик UFC жангчиси Алекс Касерес рақиблик қилади. Бу ҳар икки спортчининг Dirty Boxing'даги илк жанги бўлади. Уларнинг беллашуви мусобақанинг co main event'и бўлади.

DBX 2 турнирининг марказий жанги суринамлик таниқли UFC жангчиси Жаирзиньо Розенстрайк ҳамда Power Slap иштирокчиси Девон Шван ўртасида кечади.

Маълумот учун, Dirty Boxing Лигасига оғир вазн тоифасида UFC чемпиони Жон Жонс ҳам эгалик қилади. Лиганинг илк мусобақасида ўзбекистонлик бошқа бир аралаш яккакураш устаси — Анвар Бойназаров жанг қилиб, илк раундда нокаут орқали ғалаба қозонганди.

Илгарироқ, Саидёқуб Қаҳрамоновнинг 17 май куни WXC 97 (Warrior Xtreme Cagefighting) турнири доирасида америкалик UFC собиқ жангчиси Хосе Жонсонга қарши баҳс олиб бориши ҳақида хабар берилганди, бироқ номаълум сабабларга кўра, ушбу беллашув ташкил этилмади.