Саидёқуб Қаҳрамонов ва Фирдавс Ҳасанов жанг қилиши керак бўлган XMMA турнири ноодатий сабаб туфайли қолдирилди

8 апрель тонгида Америка Қўшма Штатларининг Жанубий Каролина штатида аралаш жанг санъатлари бўйича XMMA 6 турнири ўтказилиши лозим эди. Бироқ, промоушеннинг facebook саҳифаси орқали маълум қилинишича, мазкур санада турнир ўтказиладиган аренада хавфсизлик ходимлари етишмовчилиги юз бериши мумкинлиги туфайли турнир қолдирилган. Эндиликда турнир 3 май куни бўлиб ўтиши айтилмоқда.

Эътиборлиси, мазкур оқшомда ўзбекистонлик собиқ UFC жангчиси Саидёқуб Қаҳрамонов америкалик Франсиско Ривейрага қарши жанг қилиши керак эди. Яна бир ҳамюртимиз — Фирдавс Ҳасанов эса Жош Смитга қарши октагонга чиқиши кутилаётган эди.

Турнир доирасида жанг қилиши керак бўлган америкалик UFC собиқ жангчиси Луис Пеньянинг Instagram'да ёзишича, ташкилотчилар мусобақанинг бекор қилингани ҳақида жангчиларга ҳеч нарса айтмаган ва қўнғироқларга жавоб бермаган.

Саидёқуб Қаҳрамонов ҳам ушбу вазиятга муносабат билдирар экан, ташкилотчилардан ғазабда эканини яширмади.